Tələb təklifi doğurur

140922924731951_src-350x1961“Azad İstehlakçılar Birliyinin” sədri cənab Eyyub Hüseynov maraqlı ideya ortaya atıb: istənilən sistemə istehlakçı ilə xidmətçi arasında münasibət kimi baxmaq olar. Bu ideyanın mənası odur ki, tələb təklifi doğurur. Xidmətin səviyyəsi tələbin səviyyəsi ilə müəyyən olunur. Azərbaycanda tələbin səviyyəsi çox aşağı olduğu üçün xidmətin səviyyəsi də çox aşağı və keyfiyyətsizdir. Məsələn ictimai nəqliyyatda sərnişinlərin tələbinin aşağı olması avtobus sürücülərinin aşağı xidmətinə səbəb olur. Əgər sərnişinlər özlərinə qarşı mədəni xidmət tələb etsəydilər, öz hüquqları uğrunda mübarizə aparsaydılar onda vəziyyət tam başqa cürə olardı. Bütün dünyada alternativ xidmətlər olduğu üçün insanlar seçim edə bilirlər, adamlar daha keyfiyyətli xidməti seçirlər. Yüksək xidmət göstərə bilməyənlər gec-tez bazarı tərk edirlər. Əlbəttə, bütün bunlar bizim barəmizdə deyil. Təxminən yaxınlarda şəhərimizdə “Baghlan Qroup” şirkətinə məxsus London taksilər göründü. Şirkət xeyli pul xərcləyərək yeni avtomobillər aldı, taksometr quraşdırıldı, GPS naviqatorlar və s. Məqsəd xidmətin səviyyəsini yüksəltmək idi. Amma elə xidmət haqqı təyin olundu ki, gözlənilən effekti vermədi. Adətən başqa ölkələrdə xidmətin səviyyəsini yüksəldirlər, ya da xidmət haqqını aşağı salırlar ki, sərnişinlər xidmətdən imtina eləməsinlər.
Bizdə isə əksinə. Bəs, bizim gözəl şəhərimizdə nə baş verir? Əlbəttə bizim insanlar tələbkar olmadığı üçün istənilən müsbət addım effekt vermir. Ona görə də bizdə pis şirkətlər yaxşı olmağa can atmır, az-çox yaxşı şirkətlər isə gec-tez pis səviyyəyə düşürlər. Gəlin, yenidən cənab Hüseynovun ideyasına qayıdaq. Bütün bunlar ona görə baş verir ki, əhalinin tələbat səviyyəsi çox aşağıdır. Aşağı tələbat varsa, aşağı da xidmət olmalıdır. Bu Nəqliyyat Hərəkatı İdarəsinin işçilərinə də aiddir. Əgər vətəndaşlar daha tələbkar olsaydılar Yol Polisi İdarəsinin işçiləri də öz xidmət səviyyəsini yüksəldərdilər. Təsəvvür edirsiniz, Nəqliyyat Hərəkatının hər əməkdaşının hərəkətindən şikayət olsa, onda rəhbərlik də adekvat münasibət sərgiləyəcək. Əks təqdirdə hər şey köhnə qaydada davam edəcək. Bu gün yol polisi cərimələrə görə öz əməkdaşlarına 25 faiz mükafat verir, yəni nə qədər çox cərimələsən, o qədər də qazanırsan. Ancaq yaxşı olardı ki, hər bir qanunsuz saxlamağa, səhv protokol tərtib etməyə, kobudluğa görə yol polisi işçilərini də cərimə edəydilər. Mən düşünürəm ki, bu yaxşı işləmək üçün əla stimul olardı. Yuxarıda deyilənləri belə yekunlaşdırmaq olar ki, xidmət mədəniyyətini yüksəltmək üçün əhalinin tələbkarlıq səviyyəsi dünya səviyyəsinə yüksəlməlidir.
Fazil Məmmədov
“Qafqaz Hüquq Mərkəzi”nin nəqliyyatda hüquqi xidmət idarəsinin rəisi
Qafqaz Xəbər Agentliyi (qafqaznews.az)

  BÖLMƏYƏ AİD DİGƏR XƏBƏRLƏR