XİN: “Ermənistan xarici işlər naziri Minsk Qrupunun həmsədrlərinin bəyanatını təhrif edir”

hikmet-haciyev“Ermənistanın xarici işlər naziri yenə də öz ənənələrinə sadiq qalaraq ATƏT-in Minsk qrupu həmsədrlərinin XİN-lər səviyyəsində 8 dekabr 2016-cı il tarixində Hamburqda verdikləri bəyanatını təhrif etməkdən çəkinmir. Ermənistan ictimaiyyətini aldatmaq üçün yalnız daxili istehlaka ünvanlanmış bəyanatlarla çıxış edir”. APA-nın məlumatına görə,  bunu Ermənistanın xarici işlər naziri Edvard Nalbəndyanın KİV-ə açıqlamasına cavab olaraq Azərbaycan XİN-in mətbuat xidmətinin rəhbəri Hikmət Hacıyev deyib.

XİN rəsmisi bildirib ki, həmsədrlərin bəyanatında silahlı insidentlərin baş verməsi, güc tətbiq etmək və güc edərək hədələmək pislənir: “Güc tətbiq etmək və ya güc tətbiq edərək hədələmək prinsipindən çox danışan Ermənistan tərəfi anlamalıdır ki, bu prinsipdən irəli gələn şərtlərin icra edilməsi məsuliyyəti də bilavasitə Ermənistana aiddir. Hərbi güc tətbiq edərək Azərbaycanın ərazilərini işğal edən tərəf Ermənistandır. İnsidentlərin baş verməsinin də səbəbi Ermənistan qoşunlarının işğal olunmuş Azərbaycan ərazilərində mövcudluğudur”.

Hikmət Hacıyev vurğulayıb ki, danışıqlar prosesində hər hansı irəliləyişin ola biləcəyini görən Ermənistan tərəfi həmişə təxribatlara əl atır: “2014-cü ilin sonunda prezidentlərin Paris görüşündən sonra Ermənistanın təhriki ilə baş vermiş helikopter insidenti və məlum aprel hadisələri bunun bariz nümunələridir. Bu ilin aprelində cəbhədə vəziyyətin gərginləşməsi Ermənistanın təmas xətti boyunca sıx şəkildə yaşayan mülki Azərbaycan əhalisini vəhşicəsinə ağır silahlardan atəşə tutması, Ermənistanın birbaşa hərbi avantürası və təxribatı nəticəsində baş verdi”.

“2009-2013-cü illərdə verilmiş Akvil, Muskoka, Dövil, Los-Kabos və Enniskilen bəyanatlarından sonra ATƏT-in Minsk Qrupunun həmsədrləri Hamburq bəyanatında münaqişənin həlli üzrə addımları yenidən sadalayaraq, bu sırada ilk növbədə Azərbaycanın Dağlıq Qarabağ bölgəsi ətrafındakı ərazilərin işğaldan azad edilməsi və qaçqın və məcburi köçkünlərin geri qayıtmasının təmin olunması qeyd edir. Ermənistan xarici işlər naziri bilərəkdən bu məqamın üzərindən sükutla keçir”, XİN rəsmisi bildirib.

Hikmət Hacıyev bildirib ki, ATƏT-in Minsk Qrupunun həmsədrlərinin bəyanatında Ermənistanın möhtəkirlik obyektinə çevirməyə çalışdığı insidentlərin araşdırılması və ATƏT-in Fəaliyyətdə olan sədrinin şəxsi nümayəndəsinin ofisinin genişləndirilməsi məsələsinə də aydınlıq gətirilir: “Ermənistan xarici işlər nazirinə xatırlatmaq istərdik ki, bəyanatda bu təkliflərin münaqişənin həlli üzrə danışıqların dərhal bərpa edilməsi ilə həyata keçirilməsi qeyd olunur. Azərbaycan tərəfi bununla əlaqədar dəfələrlə bildirmişdi ki, insidentlərin araşdırılması mexanizmi münaqişənin həlli üzrə substantiv danışıqlarla sinxronlaşdırılmalı və onun tərkib hissəsi olmalıdır.Ermənistan xarici işlər nazirinin istinad etdiyi 1994-1995-ci il atəşkəs rejiminə dair razılaşmaya gəldikdə isə bu çərçivədə Ermənistan qoşunlarının Azərbaycanın işğal olunmuş ərazilərindən çıxarılması üzrə vaxt cədvəlinin olması barədə müddəanı qeyd etmək lazımdır”.

XİN rəsmisi bildirib ki, Ermənistan xarici işlər naziri Helsinki Yekun Aktını və xalqların öz müqəddəratını təyin etmə prinsipini yenə də təhrif edir: “ Onun yaddaşını təzələmək istərdik ki, xalqların öz müqəddəratını təyin etməsi hüququnun ifadəsi hər hansı dövlətin ərazi bütövlüyü və ya siyasi müstəqilliyinə qarşı fəaliyyətin həyata keçirilməsinə imkan verən hal kimi təfsir oluna bilməz. Helsinki Yekun Aktının 8-ci bəndində deyilir: “İştirakçı dövlətlər xalqların bərabər hüquqları və öz müqəddəratını təyin etmək hüququna hörmət edərək, bütün hallarda BMT Nizamnaməsinin məqsəd və prinsiplərinə və beynəlxalq hüququn müvafiq normalarına, eləcə də dövlətlərin ərazi bütövlüyünə uyğun şəkildə fəaliyyət göstərəcəklər. Eyni zamanda ATƏT-in Minsk Qrupunun həmsədrlərinin bəyanatında mövcud işçi təkliflər əsasında davamlı sülhü təmin etmək üçün danışıqların aparılması qeyd olunur. Amma Ermənistan tərəfi substantiv danışıqlardan yayınmaq üçün şərtlər və bəhanələr irəli sürür, görüşlərdən yayınır, Vyana və Sankt-Peterburq razılaşmalarına zərbə vurur, cəbhədə gərginlik yaradır, açıq şəkildə sülh prosesini pozmaq və status kvonu saxlamaq siyasəti yürüdür. Ermənistanın Azərbaycanın işğal olunmuş ərazilərində hərbi quruculuğunu möhkəmləndirmək, bu ərazilərin demoqrafik, mədəni və fiziki xarakterini qanunsuz olaraq dəyişmək cəhdlərini davam etdirməsi Ermənistan tərəfinin əsl niyyətini ortaya qoyur. Ona görə də ATƏT-in Minsk Qrupunun həmsədrlərinin bəyanatının kimə ünvanlandığı və nəyi ehtiva etdiyi hamıya çox yaxşı məlumdur”.

  BÖLMƏYƏ AİD DİGƏR XƏBƏRLƏR