Donor təşkilatlar məcburi köçkün probleminin həllinə kömək etmir?

Bəzi beynəlxalq donor təşkilatları Azərbaycanın şəffaflıq tələbini hökumətin yaratdığı əngəl kimi qiymətləndirir. Bunu Baş nazirin müavini, Azərbaycan Dayanıqlı İnkişaf üzrə Milli Əlaqələndirmə Şurasının sədri Əli Əhmədov “Azərbaycanda Dayanıqlı İnkişaf Məqsədlərinə nail olmaqda vətəndaş cəmiyyətinin rolu” adlı konfransda çıxışı zaman deyib. Ə.Əhmədov bildirib ki, Azərbaycan hökuməti şəffaf şəkidə fəaliyyət göstərən beynəlxalq donor təşkilatları ilə əməkdaşlıq etməyə hazırdır: “Kimlər ki şəffaf şəkildə fəaliyyət göstərirsə, biz onlarla əməkdaşlıq etməyə hazırıq. Ancaq nəyə görə şəffaflıq tələb olunanda bunu əngəl kimi qiymətləndirirlər?!”

Baş nazirin müavini bildirib ki, hər bir dövlətin təhlükəsizliyini qorumaq üçün addımlar atmaq hüququ var: “Torpaqlarımız işğal olunub, 1 milyondan artıq insanımız qaçqın və məcburi köçkün şəraitindədir. Bu baxımdan beynəlxalq donorlar, ilk növbədə, Azərbaycanda qaçqın və köçkün problemlərinin köklü həllinə, torpaqlarımızın işğaldan azad edilməsinə yardımçı olmalıdırlar.

Ona görə də, ilk növbədə, dövlət maraqlarını düşünməliyik. Hər hansı beynəlxalq donorun üzərinə kölgə salmaq niyyətində deyiləm. Ancaq Azərbaycan torpaqlarının bir hissəsi işğal olunan, müharibə vəziyyətində olan ölkədir. Ona görə də bu, hökuməti müəyyən addımlar atmağa məcbur edir. Bu səbəbdən də beynəlxalq donorların fəaliyyəti ilə bağlı sərtləşdirmələr var”.

Ə.Əhmədov qeyd edib ki, başqa ölkələr də belə addımlar atır: “Bu sahədə tam şəffaflığın olması yaxşı olar. Amma təəssüf ki, hökumətin bu sahədə şəffaflıq tələb etməsini bəzi donorlar əngəl yaradılması kimi qiymətləndirir. Biz istəyirik ki, hər şey tam şəffaf olsun, ayrılan vəsaitin hansı məqsədlə və hara xərcləndiyini bilək”. (APA )

“Minalar Əleyhinə Azərbaycan Kampaniyası” İctimai Birliyinin sədri Hafiz Səfixanov LEGİON-a bildirib ki, Əli Əhmədov hökumət üzvü kimi Azərbaycanın əsas problemini beynəlxalq ictimaiyyətə çatdırmaq istəyir:  “ Mən razıyam ki, qaçqın və məcburi köçkün, Qarabağ problemi əsas problemdir. Amma nəzərə almalıyıq ki, hər bir beynəlxalq təşkilatın konkret olaraq öz fəaliyyət sferası var. Məsələn, əlillər və gənclər problemi ilə məşğul olan donor təşkilatı əlbəttə məcburi köçkün problemi ilə məşğul olmayacaq”.

Səfixanovun fikrincə, hökumət bütün donor təşkilatları qaçqın problemi ilə məşğul olmağa yönəltmək istəyirsə, əlbəttə donor təşkilatlar bununla razılaşmayacaq.

Məsələ ilə bağlı “Konstitusiya” Araşdırmaları Fondunun rəhbəri Əliməmməd Nuriyev LEGİON-a bildirib ki, Əli Əhmədov bəyan etdi ki, məcburi köçkün probleminə hamı tərəfindən dəstək olmalıdır, çünki onların hüquqları kütləvi şəkildə pozulub: “ Əli Əhmədov həm də bildirdi ki, beynəlxalq donor təşkilatları Azərbaycan torpaqlarının işğalının nəticələrini aradan qaldığmağa dəstək verməlidirlər”.

Rəşad Rüstəmov

LEGİON

  BÖLMƏYƏ AİD DİGƏR XƏBƏRLƏR