Həm adına maaş yazılır, həm də avtomobili var – Amma heç birindən özünün xəbəri yoxdur – VIDEO

Goranboy sakini qeyri-adi halla üzləşib
Ünvanlı sosial yardım üçün müraciət etdikdə onun adına həm avtomobil olduğu, həm də maaş yazıldığı ortaya çıxıb. Halbuki, heç birindən özünün xəbəri olmayıb.
Həm adına maaş yazılır, həm də avtomobili var. Amma heç birindən özünün xəbəri yoxdur.
Goranboyun Yolpaq kənd sakini olan Eldəniz Məmmədov məktəbdə texniki işçi olaraq çalışıb. 2 il əvvəl isə işdən çıxıb və sosial müavinət almaq üçün müraciət edib. Lakin qurumdan gələn cavab onu təəccübləndirib. Ona müavinət verilməsindən imtina edilib və səbəb kimi də adına maaş yazıldığı göstərilib. Bu da azmış kimi adında avtomobil olduğu ortaya çıxıb.
Eldəniz Məmmədo adındakı avtomobillə bağlı Baş Dövlət Yol Polisi İdarəsinə məktubla müraciət edib. Ona bildirilib ki, bu problem səhvən yaranıb. Həmin maşın eyni ad-soyadlı Şəmkir sakininə məxsusdur.
Maaş məsələsi ilə bağlı isə Yolpaq kənd orta məktəbinin direktoru Arzu Piriyev “Xəzər Xəbər”ə bildirib ki, Eldəniz Məmmədov əvvəlki direktorun vaxtında işləyib. Onun əmək müqaviləsinə də işdən çıxdığı vaxtdan xitam verilib. Lakin naməlum səbəblərdən hələ də bazada maaş yazılan kimi görünür. Direktor qeyd etdi ki, Eldəniz Məmmədov yenidən şəxsiyyət vəsiqəsi ilə məktəbə müraciət etsin. Onun sənədləri hazırlanaraq Rayon Təhsil Şöbəsinə göndəriləcək ki, problem həllini tapsın.

  BÖLMƏYƏ AİD DİGƏR XƏBƏRLƏR