2 gün əvvəl  musavat.com  saytı  Dövlət Bayrağı Meydanı Kompleksi İdarəsinin keçmiş rəisi, “Azimport” şirkətinin sahibi Rəşad Məmmədovun  həbs olunması ilə bağlı məlumat yaydı. Yeri gəlmişkən, 8 mayda Qafqaz  Xəbər  Agentliyi (qafqaznews.org)  “ İH-nin şöbə müdiri: AZİMPORT vəkilin əmlakını dağıdıb”  başlıqlı məqalə dərc etmişdi.  Məqalə   Rəşad Məmmədovun şirkətinin vəkil Ramiz  Zeynalovun əmlakını ələ keçirməsindən bəhs edirdi.

8 mayda  qafqaznews.az  saytı isə “AZİMPORT”-un işçilərinin neçə aydır  əmək haqlarını almaması səbəbindən Səbail rayonu, Bayıl qəsəbəsi ərazisində Salyan şose  yolunu bağladıqları  barədə  məlumat  yaymışdı.

Qafqaz  Xəbər  Agentliyi (qafqaznews.org) məlumatın dəqiqliyini yoxlamaq qərarına gəldi.

Bu  məqsədlə  şirkətin  təhlükəsizlik xidmətinin başçısı Maqsud Məhərrəmova müraciət etdik. O, aksiya ilə bağlı yayılan xəbəri nə təsdiq, nə də təkzib etdi. Və “ Mənim telefon nömrəmi sizə kim verib? “ deyərək dəstəyi asdı.

Görəsən, başçısı həbsdə olan şirkətin işçilərini nə gözləyir? Onlar əmək haqqlarını ala biləcəklərmi?

Əmək hüququ üzrə  hüquqşünas  Azər  Quliyev bizə bildirdi ki, “AZİMPORT”un işçilər inzibati qaydada öz əmək haqlarını tələb edə bilərlər: “ Əgər şirkət  sahibkarlıq fəaliyyəti ilə məşğul olursa, deməli pul qazanır.Həm də şirkətin əmlakı olmalıdır. Həmin əmlakı satmaqla əmək haqları verilməlidir”.

Rəşad Rüstəmov

Qafqaz Xəbər Agentliyi (qafqaznews.org)