ABŞ dolları ilk dəfə olaraq rus rubluna nisbətdə 40-dan qalxıb. Bir dollar 40.04 rubla bərabər olub.
“RİA Novosti” və TASS oktyabrın 6-da Moskva birjasında rublun bir az da düşdüyünü xəbər verir.
Son 3 ayda Rusiya valyutası davamlı olaraq düşür. Səbəb Rusiyanın Ukrayna münaqişəsindəki roluna görə ABŞ və Avropa Birliyinin bu ölkəyə qoyduğu sanksiyalardır.
İyulun əvvəlində bir dollara 34 rubl almaq olardı. Oktyabrın 4-də isə bir dollar 39.70 rubla bərabərləşdi.
1991-ci ildə SSRİ-nin çökməsindən sonra rublun səviyyəsi diqqətlə izlənir. Rusiyalıların çoxu ona iqtisadi güc və ya zəiflik faktoru kimi baxır.
Rublun dollara nisbətdən 40-dan çox düşməsini Kremlin düşmənləri, məsələn, Aleksey Navalnı alqışlayıb. O, qeyd edib ki, yuvarlaq rəqəm hesablamaları sadələşdirəcək.
