Bakıda bir sıra kafe və restoranların fəaliyyəti dayandırılıb. Bağlanan məkanlar arasında "Mytcha" (Tarqovı), "Pivnaya Apteka" (Port Baku), "CEO’s Lounge" (Ağ Şəhər), "Milk Lab" (Ağ Şəhər) və "Turco Burrito" (Tarqovı) yer alır.
Eyni zamanda sosial şəbəkələrdə geniş izləyici kütləsinə malik iş adamı İlyas Möhnətovun kafenin də bağlandığı, habelə onun qadın geyim mağazasının da əvvəlki günlərdə fəaliyyətini dayandırdığı bildirilir.
Kafelərin ardıcıl bağlanması paytaxtın iaşə sektorunda vəziyyətlə bağlı suallar doğurub. Liberal İqtisadçılar Mərkəzinin sədri Akif Nəsirli hesab edir ki, bu proses yalnız müştəri sayının azalması ilə izah edilə bilməz. O bildirir ki, əsas səbəblərdən biri xərclərin sürətlə artmasıdır: icarə haqları, əməkhaqqı, kommunal ödənişlər və ərzaq qiymətlərinin yüksəlməsi restoranların maya dəyərini artırır.
Nəsirli vurğulayıb ki, şəhərin mərkəzi və prestijli zonalarında yüksək icarə xərcləri biznes üçün ciddi yükdür. Eyni zamanda insanların gündəlik xərclərinin böyüməsi müştərilərin restoranlara ayırdığı büdcəni məhdudlaşdırır, nəticədə xidmət və yemək xərcləri azalır. Onun sözlərinə görə, mövcud sabit xərclər şəraitində müştəri sayında nisbətən kiçik azalma belə obyekt üçün maliyyə çətinliyi yarada bilər.
Ekspert həmçinin sektorda rəqabətin güclü olmasına diqqət çəkib. Son illərdə kafe və restoranların sayının artması eyni auditoriyaya yönələn məkanların dövriyyəsini zəiflədə bilər. Sosial şəbəkələrdə tanınmış olmaq mütləq gəlirlilik təmin etmir; tanınma müştəri axını yarada bilər, lakin xərclər gəlirləri üstələyirsə fəaliyyət davam etdirmək çətinləşir.
Akif Nəsirli qiymət və keyfiyyət balansının qorunmasının vacibliyini də qeyd edib. Qiymət artdıqca müştəri daha münasib alternativlər axtarır və restoranlar həm keyfiyyəti saxlamalı, həm də qiymətləri müştəri üçün qəbul edilən səviyyədə tutmalıdırlar ki, kifayət qədər marja təmin edilsin.
Azərbaycan Qiymətləndiricilər Cəmiyyətinin sədri Vüqar Oruc bildirib ki, bəzi obyektlər təqdimatını yeniləmək və ya rebrendinq üçün müvəqqəti fəaliyyətini dayandırır, yeni xidmətlər əlavə edir və beləliklə fəaliyyət formasını dəyişirlər. O qeyd edib ki, bir obyektin bağlanması bazarda yeni obyektin yaranması deməkdir.
Oruc əlavə edib ki, iaşə obyektlərini işlətmək hazırda çətindir: prestijli zonalarda icarə haqları yüksəkdir və əgər ticarət qarşılığı yoxdursa uzun müddət davam etmək mümkün olmur. Həmçinin ərzaq, yanacaq və əməkhaqqında baş verən artımlar biznes üçün ciddi maddi baza tələb edir. Buna görə də bəzi məkanlar fəaliyyətini dayandırır.
Cəmiyyət sədri mövcud vəziyyəti iqtisadi böhran kimi qiymətləndirməyin doğru olmadığını, paytaxtda axşam saatlarında boş iaşə müəssisələri tapmağın çətin olduğunu vurğulayıb. O, müştəri davranışının dəyişməsi, mövsümi amillər və xidmətin keyfiyyətinə görə seçilən məkanların fərqlənməsi kimi səbəblərin rol oynadığını bildirib.
Oruc həmçinin xidmət qiymətlərinin hər il ən azı 10 faizədək artdığını və buna baxmayaraq kafelərin və restoranların hələ də fəaliyyət göstərməsinin tələb və müştəri bazasının mövcudluğunu göstərdiyini söyləyib. O, bağlanmaların süni ajiotaj yaratmamalı olduğunu və ölkə iqtisadiyyatının uyğun addımlarla mövcud yükü qaldıra biləcəyini qeyd edib.
