Azərbaycanda gənclər arasındakı işsizlik nisbətinin yüksək qalmasının əsas səbəblərindən biri əmək qüvvəsinin və gənclərin ölkə üzrə bərabər paylanmamasıdır.
Əmək Hüquqlarının Müdafiəsi Liqasının rəhbəri Sahib Məmmədov bildirib ki, işçi qüvvəsinin böyük hissəsi Bakı, Abşeron və Sumqayıt aqlomerasiyalarında cəmləşdiyindən bu regionlarda iş axtaranlar arasında rəqabət daha güclüdür.
Məmmədov əlavə edib ki, ölkə miqyasında təxminən 65 minə yaxın qeydiyyata alınmış vakant iş yerlərinin mövcudluğu əmək bazarında peşə və coğrafi uyğunluğun zəif olduğunu göstərir.
Ekspertin sözlərinə görə, əmək bazarına daxil olan şəxslərin sayı hələ də bazarı tərk edənlərin sayından çoxdur; fertilikliyin azalmasına baxmayaraq, bu göstərici hələ də müsbət olaraq qalır.
2026–2030-cu illəri əhatə edəcək Məşğulluq Strategiyasının ikinci tədbirlər planında gənclərin əmək bazarına cəlb edilməsi üçün bir sıra konkret addımlar nəzərdə tutulub. Bu tədbirlər arasında gənclər üçün startapların təşviqi, hibrid təlimlərin təşkili, peşə yönümünün dəyişdirilməsi və yeni ixtisasların öyrədilməsi yer alır.
Sahib Məmmədov vurğulayıb ki, bütün hallarda gənclər arasında işsizlik səviyyəsi bir müddət hələ yüksək olaraq qalmağa davam edəcək.
