Bu ilin ilk yeddi ayında Azərbaycana ümumilikdə 9 milyard 880,7 milyon dollar dəyərində mal gətirilib. Həmin dövrdə yeyinti məhsullarının idxalı 1 milyard 594,2 milyon dollar səviyyəsində olub.
Miqdar baxımından ən çox gətirilən ərzaq məhsulu buğda, dəyər baxımından isə tərəvəz və meyvə olub. Hesabat dövründə ölkəyə 214,6 min ton tərəvəz və meyvə idxal edilib, onların statistik dəyəri 193,7 milyon dollar (329,2 milyon manat) təşkil edib. Bu göstəricilər əsasında 1 kiloqram üçün orta gömrük dəyəri təxminən 1,53 manatdır.
Bu dövrdə ölkəyə 631,7 min ton buğda gətirilib, buğdanın statistik dəyəri 143,5 milyon dollar (243,9 milyon manat) olub. Hesablamalara görə 1 kiloqram buğdanın orta gömrük dəyəri 0,39 manatdır.
Bitki və heyvan mənşəli piy və yağların idxalı 104,4 min ton təşkil edib, bu məhsulların statistik dəyəri 167,3 milyon dollar (284,4 milyon manat) olub. Orta hesabla 1 kiloqram üçün gömrük dəyəri 2,73 manatdır.
Kərə yağı və süddən hazırlanmış digər yağlardan 15,1 min ton gətirilib, onların dəyəri 94,6 milyon dollar (160,8 milyon manat) təşkil edib və 1 kiloqramın orta gömrük dəyəri 10,66 manat olub.
Çay idxalı 8,1 min ton həcmində olub, statistik dəyər 48,7 milyon dollar (82,8 milyon manat) təşkil edib və 1 kiloqramın orta gömrük dəyəri 10,19 manatdır.
Ət idxalı 28 min ton həcmində qeydə alınıb, bu məhsulların statistik dəyəri 66,1 milyon dollar (112,4 milyon manat) olub; 1 kiloqram ətin orta gömrük dəyəri 4,01 manat təşkil edir.
Düyü idxalı 27,4 min ton həcmində olub və onun statistik dəyəri 24,1 milyon dollar (41 milyon manat) olaraq göstərilib. Bu göstəriciyə əsasən 1 kiloqram düyünün orta gömrük dəyəri 1,50 manat səviyyəsindədir.
Süd və qaymaq məhsullarından 13,2 min ton idxal edilib, statistik dəyəri 25,6 milyon dollar (43,6 milyon manat) təşkil edib və 1 kiloqram üçün orta gömrük dəyəri 3,31 manatdır.
Qarğıdalı idxalı 30,6 min ton həcmində olub, onun statistik dəyəri 14,4 milyon dollar (24,5 milyon manat) təşkil edib və 1 kiloqram üçün orta gömrük dəyəri 0,80 manatdır.
