Azərbaycan Mərkəzi Bankının təklifi vətəndaşlara əməkhaqqı, təqaüd və sosial ödənişlərin hansı bank vasitəsilə alınacağını seçmək imkanı yaradacaq.
Ekspert Xalid Kərimli bildirir ki, yeni qayda şəxslərə ödənişlərin yönəldiləcəyi bank hesabını müəyyən etmək hüququ verəcək. Vətəndaş daha əlverişli hesab etdiyi bankın kartına vəsaitin köçürülməsini tələb edə biləcək və istədiyi halda əvvəlki bankla əməkdaşlığı davam etdirə biləcək.
Bu yanaşma banklar arasında rəqabəti artıracaq. Əvvəllər maaş kartları əsasən bir neçə böyük bankda cəmləşdiyindən həmin banklar əməkdaşlıq etdikləri şirkət və dövlət qurumlarının müştəri gəlir və xərcləmə məlumatlarına əsaslanaraq əlavə xidmətlər təklif edirdilər. Yeni sistem vəsaitlərin müxtəlif banklara bölünməsini mümkün edəcək.
Kərimli hesab edir ki, banklar müştəriləri özünə cəlb etmək üçün kart və xidmətləri daha rəqabətli edəcək, bununla bağlı loyallıq proqramları, qalığa faiz, komissiyaların azaldılması və keşbek kimi mexanizmlərdən istifadə oluna bilər.
Qayda yalnız yeni maaş alan şəxslərə məhdudlaşdırılmayacaq və ümumilikdə tətbiq olunacaq. Plan üzrə ilkin mərhələdə dəyişikliklər dövlət sektorunda çalışanlardan başlanacaq, daha sonra digər sahələrin də sistemə keçməsi gözlənilir. Vətəndaşlar əməkhaqqının hansı bank kartına köçürüləcəyini müraciət və ya mobil tətbiq vasitəsilə seçə biləcəklər.
