Prezident İlham Əliyevin sərəncamına əsasən general-mayor Aqşin Ramiz oğlu Məhərrəmova "general-leytenant" ali hərbi rütbəsi verilib.
Aqşin Məhərrəmov 14 avqust 1982-ci ildə Xaçmaz rayonunda anadan olub. Hərbi xidmət çərçivəsində hazırda Dövlət Sərhəd Xidmətinin Xüsusi Hava Əməliyyatları Qüvvələrinin Komandanı vəzifəsini tutur.
O, müxtəlif vaxtlarda döyüş və xidmətə görə bir sıra təltiflər alıb: 2010-cu ildə "İgidliyə görə" medalı, 2012-ci ildə "Azərbaycan Bayrağı" ordeni, 2014-cü ildə "Vətən uğrunda" medalı, 2016-cı ildə "Vətənə xidmətə görə" 3-cü dərəcəli ordeni, 2019-cu ildə isə 3-cü dərəcəli "Rəşadət" ordeni ilə mükafatlandırılıb.
Prezident İlham Əliyevin 17 avqust 2020-ci il tarixli 2215 nömrəli sərəncamı ilə o zaman Aqşin Məhərrəmova "general-mayor" rütbəsi verilib.
27 sentyabr 2020-ci ildə başlayan Vətən müharibəsi zamanı Məhərrəmov hərbi əməliyyatların rəhbərlərindən biri olub. Azərbaycan ərazilərinin işğaldan azad olunması və ərazi bütövlüyünün bərpasında göstərdiyi xidmətə görə o, 9 oktyabr 2020-ci il tarixli 2338 nömrəli sərəncamla "Zəfər" ordeni ilə təltif edilib. 24 və 25 dekabr 2020-ci il tarixli sərəncamlarla isə ona "Cəbrayılın azad olunmasına görə" və "Zəngilanın azad olunmasına görə" medalları təqdim edilib.
2022-ci ilin avqustunda Aqşin Məhərrəmov Dövlət Sərhəd Xidməti Baş Qərargahının Dövlət Sərhədinin Mühafizəsi Baş İdarəsinin rəisi təyin edildi. Bu vəzifədə olduğu dövrdə 12–13 sentyabr 2022-ci il tarixlərində Zəngilan istiqamətində baş vermiş genişmiqyaslı təxribatların qarşısının alınmasında və 23 aprel 2023-cü il tarixində Laçın-Xankəndi yolunun başlanğıcında Həkəri çayı üzərində dövlət sərhədindən buraxılış məntəqəsinin qurulması tapşırığının icrasında fərqlənib.
22 iyun 2023-cü il tarixində o, Baş Qərargahın Dövlət Sərhədinin Mühafizəsi Baş İdarəsinin rəisi vəzifəsindən azad edilərək Dövlət Sərhəd Xidməti Xüsusi Hava Əməliyyatları Qüvvələrinin Komandanı təyin olunub.
Faiq Həmzəağa oğlu Məmmədov uzun müddət Dövlət Sərhəd Xidməti sıralarında xidmət edir. Bu ilin fevral ayında o, DSX-nin Mərkəzi Aparatının rəhbəri təyin edilib. Əvvəllər Baş idarə rəisi və DSX Akademiyasının rəis əvəzi vəzifələrində çalışıb.
