2026-cı ilin iyul ayında Gürcüstandan digər ölkələrə pul köçürmələri üzrə Azərbaycan birinci yerdə qərarlaşıb.
Gürcüstan Milli Bankının açıqladığı məlumatlara əsasən, iyul ayında ölkədən xaricə ümumilikdə 39 milyon ABŞ dolları (təxminən 102,8 milyon lari) göndərilib. İllik müqayisədə bu məbləğ 4,7% artıb.
Hesabat dövründə Azərbaycana 6,985 milyon ABŞ dolları məbləğində pul köçürülüb və beləliklə Azərbaycan Gürcüstandan ən çox vəsait alan ölkə olub.
Türkiyə 6,435 milyon dollarla ikinci, Rusiya isə 3,663 milyon dollarla üçüncü pillədə yerləşib. Ötən ilin iyulunda ən çox vəsait alan ölkə Türkiyə idi; 2026-cı ilin iyulunda isə Azərbaycan onu qabaqlayıb.
Pul köçürmələri üzrə ilk ona Ukrayna (2,436 milyon dollar), Özbəkistan (2,43 milyon dollar), Yunanıstan (2,247 milyon dollar), Qazaxıstan (1,916 milyon dollar), İtaliya (1,395 milyon dollar), Almaniya (1,168 milyon dollar) və Ermənistan (1,029 milyon dollar) daxildir.
