Misir, İndoneziya, İordaniya, Qətər, Birləşmiş Ərəb Əmirlikləri, Pakistan, Səudiyyə Ərəbistanı və Türkiyənin xarici işlər nazirləri İsrailin ABŞ prezidentinin Qəzza ilə bağlı sülh təşəbbüsünü həyata keçirməkdən imtina etməsini kəskin tənqid ediblər.
Səkkiz ölkənin nazirləri avqustun 16-da birgə bəyanat yayıb. Sənəddə Trampın Qəzzaya dair yol xəritəsi planına istinad olunub və İsrailin təklifi rədd etməsinin planın bütövlükdə icrasını təhlükə altına sala biləcəyi vurğulanıb.
Bəyanatda planın əsas məqamları sadalanır: hərbi əməliyyatların dayandırılması, Fələstin qruplaşmalarının tərksilah edilməsi, İsrail qüvvələrinin Qəzzadan çıxarılması, beynəlxalq sabitləşdirmə qüvvələrinin yerləşdirilməsi və ərazidə yeni idarəetmə modelinin yaradılması.
Nazirlər həmçinin İsrailin Fələstin dövlətinin yaradılmasına münasibətini pisləyiblər. Onların sözlərinə görə, fələstinlilərin müstəqil dövlət qurmaq hüququ mövcuddur və bu prinsipdən imtina cəhdləri Yaxın Şərqdə sülh və sabitlik perspektivlərini zəiflədir.
Birgə bəyanatda müharibə başa çatdıqdan sonra Qəzzanın bərpasına dair prioritetlərin diqqətə alınması və ərazidə təhlükəsiz idarəetmənin təmin edilməsi çağırışı yer alıb. Plana əsasən, Qəzzanın inzibati idarəçiliyi Milli İdarəetmə Komitəsinə verilməsi nəzərdə tutulur.
