Bakı Ağır Cinayətlər Məhkəməsinin hökmünə görə, əsl adı Abbasov Kazım Elşən oğlu olan şəxs özünü "David Seliverstov" kimi təqdim edərək müxtəlif şəxsləri aldamaqda ittiham olunub.
Məhkəmə sənədlərində göstərilir ki, Abbasov əvvəllər polis mayoru olduğunu iddia edib, sonradan isə "beynəlxalq hüquq müdafiəçisi" və yəhudi əsilli şəxs imici yaradıb. Sənədlərdən çıxan nəticəyə görə, onun əsas məqsədi insanlardan pul almaq olub.
Hökm 8 yanvar 2016-cı il tarixində çıxarılıb, işə hakim Azər Orucovun sədrliyi ilə Mayıl Bayramov və Rahib Salmanov baxıblar. Məhkəmə təqsirləndirilən şəxsin müxtəlif şəxslərə polis idarəsinin əməkdaşı kimi təqdim olunmaqla işə düzəltmə vədini verərək külli miqdarda vəsait ələ keçirdiyini müəyyən edib.
Hökmdə üç əsas dələduzluq epizodu əksini tapıb. Birinci epizodda Abbasov Şahin Zeyniyevə özünü Yasamal rayonunda vəzifəli şəxs kimi göstərərək Azərbaycan Dövlət Neft Şirkətinə işə düzəldəcəyini vəd edib və ümumilikdə 12 min manat nağd pul alıb. Sənədə görə, ilkin 10 min manat 2013-cü ilin dekabrında, əlavə 2 min manat isə 2014-cü ilin yanvarında verilib.
İkinci epizod Samir Səmədovla bağlıdır. Hökümə əsasən, Abbasov ona polis orqanlarında iş təmin edəcəyini deyərək müxtəlif vaxt və məkanlarda ümumilikdə 11 min 750 manat nağd pul alıb. Zərərçəkmiş pulu toplamaq üçün kredit götürdüyünü və hətta avtomobilini satdığını ifadə edib.
Üçüncü epizodda isə Abbasov Elçin Mustafayevdən əvvəlcə Türkiyədən geyim gətirərək ticarət qurmaq vəd edib, 15 min manat alıb. Geyimlər gətirilmədikdən sonra həmin məbləğin müqabilində Rabitə və İnformasiya Texnologiyaları Nazirliyində işə düzəldəcəyini söz verib, lakin vədi yerinə yetirilməyib. Zərərçəkmiş pulun bir hissəsini geri tələb etdikdə Abbasov 1 000 manatı qaytarıb, qalan məbləği isə verməyərək gizlənib.
Təqsirləndirilənin nəzarətində olan "Toyota Prado" markalı avtomobildən aparıcı rütbəli poliçiyə xas paqonlar, polis formaları, qandal və oyuncaq tapançaya bənzər predmet, müxtəlif şəxslərə və avtomobillərə aid sənədlər və Nəsimi ilə Yasamal rayon polis idarələrinin rəislərinin adına yazılmış ərizələr və izahatlar aşkarlanıb.
Hökmdə həmçinin Abbasovun narkotik vasitələrin qanunsuz dövriyyəsinə görə məsuliyyəti təsdiqlənib. Məhkəmə müəyyən edib ki, o, Oqtay Cabbarov və Fərid Kərimovla əlbir olaraq satış məqsədilə ümumi çəkisi 5,756 qram olan heroin əldə edib; maddənin 2,899 qramı Fərid Kərimova, 2,857 qramı isə Oqtay Cabbarova verilib. Ekspertiza həmin maddələrin kustar üsulla hazırlanmış heroin olduğunu və kimyəvi tərkibinin eyni olduğunu müəyyən etmişdir.
Sənədlərdə Abbasovun əvvəllər də məhkum olunması göstərilir. Nəsimi Rayon Məhkəməsinin 25 avqust 2011-ci il hökmü ilə ona 3 il 6 ay həbs kəsilmiş, daha əvvəl Xəzər Rayon Məhkəməsinin 22 iyun 2011-ci il hökmü ilə 2 il azadlıqdan məhrumetmə və digər qərarlar mövcuddur. 16 avqust 2014-cü ildə ailəvi görüş üçün icazə ilə cəzaçəkmə müəssisəsindən çıxması və 19 avqust 2014-cü ildə geri qayıtmaması nəticəsində cəza yerindən qaçmaq faktı da sənədlərdə yer alıb.
Məhkəmə təqsirləndirilən şəxsin əvvəllər də məhkum olunması və yenidən qəsdən cinayətlər törətməsini residiv kimi qiymətləndirərək bu halı cəzanın ağırlaşdıran amil sayıb.
Nəticədə, məhkəmə Abbasov Kazım Elşən oğlunu xüsusilə külli miqdarda ziyan vurmaqla dələduzluq (178.3.2), narkotiklərin satış məqsədilə qanunsuz dövriyyəsi (234.4.1) və cəza yerindən qaçma (305) maddələri ilə təqsirli bilib. Ona dələduzluğa görə 9 il, narkotiklərlə bağlı 7 il, cəzaçəkmdən yayınma üzrə isə 10 ay azadlıqdan məhrumetmə cəzası təyin olunub. Cəzalar qismən toplandıqdan sonra yekun olaraq 11 il hesablanmış, əvvəlki hökmün çəkilməmiş hissəsi əlavə olunmaqla qəti 12 il müddətinə azadlıqdan məhrum etmə qərarı verilib.
Cəzanın icrasına 29 sentyabr 2014-cü ildən başlanması müəyyən edilib. Beləliklə, məhkəmə sənədləri Abbasovun əvvəlki məhkumluqları nəzərə alınmaqla, dələduzluq, narkotik dövriyyəsi və cəzaçəkmdən yayınma kimi ağır əməllərinə görə residivist şəxs olduğunu təsdiq edir.
Məhkəmə hökmü həmçinin zərərçəkmişlərin ifadələri, şahid ifadələri, əməliyyat sənədləri və ekspertiza rəyləri əsasında sübutların tamlıqla təsdiqləndiyini göstərir.
