Prezident İlham Əliyev avqustun 18-də Böyük Britaniya və Şimali İrlandiya Birləşmiş Krallığının Azərbaycana yeni təyin olunmuş fövqəladə və səlahiyyətli səfiri Dankan Normanı qəbul edib.
Səfir etimadnaməsini dövlət başçısına təqdim edib. Görüşdə Dankan Norman çıxışına Azərbaycan dilində başlayıb və həyat yoldaşı Kerri ilə 27 il əvvəl Azərbaycana ilk dəfə gəldikləri vaxtdan bu yana ölkədə müşahidə etdiyi dəyişikliyi vurğulayıb.
Norman bildirib ki, o vaxtdan ölkə əhəmiyyətli inkişaf yolu keçib və bu münasibətləri yeni səhifə ilə davam etdirməkdən məmnundur. O, Birləşmiş Krallıqla Azərbaycan arasında yeni strateji tərəfdaşlıq üzərində işin davam etdiyini, bu əməkdaşlığın ortaq prioritetlər çərçivəsində dərinləşəcəyini, təhlükəsizliyin gücləndiriləcəyini və innovasiyalar vasitəsilə nailiyyətlərin artırılacağını qeyd edib.
Səfir bərpaolunan enerji, müdafiə və aviasiya sahələrində dinamik tərəfdaşlıq qurmaq istədiklərini, təhsil əlaqələrinin vacib olduğunu və gənclər arasında əlaqələrin gücləndiyini vurğulayıb. Həmçinin Prezident İlham Əliyevin Azərbaycan və Ermənistan arasında sülhün bərqərar olması istiqamətindəki səylərinin Böyük Britaniya tərəfindən təqdir olunduğunu bildirərək bu irəliləyişin dəstəkləndiyini söyləyib.
Dankan Norman ölkəsinin Azərbaycanın minatəmizləmə fəaliyyətlərini dəstəkləyən ilk beynəlxalq tərəfdaşlardan biri olduğunu da xatırladıb.
Prezident İlham Əliyev səfirə Azərbaycanda xoş vaxt keçirməyi arzulayıb və onun Azərbaycan dilində çıxışını yüksək qiymətləndirib. Dövlət başçısı həmçinin ikitərəfli gündəlik məsələlərin regional inkişaf və əməkdaşlıq baxımından da mühüm əhəmiyyət kəsb etdiyini vurğulayıb.
Minatəmizləmə sahəsində göstərilən yardıma görə Böyük Britaniya Hökumətinə təşəkkür ifadə edən Prezident İlham Əliyev bu sahədə Azərbaycanın daha sıx beynəlxalq əməkdaşlığa ehtiyacı olduğunu bildirib.
Dövlət başçısı Azərbaycan və Böyük Britaniya münasibətlərinin təxminən otuz il əvvəl enerji sahəsində başladığını xatırladaraq bərpaolunan enerji sahəsində əməkdaşlıq üçün böyük potensialın mövcud olduğunu, bu kontekstdə ölkədə ilk Günəş elektrik stansiyasının bp tərəfindən inşa edildiyini qeyd edib.
Prezident İlham Əliyev müstəqilliyimizin 35 illiyi münasibətilə bir il sülh şəraitində yaşanmasının region üçün əhəmiyyətli dəyişiklik olduğunu qeyd edib və regiondakı vəziyyəti nəzərə alaraq təhlükəsizliyin prioritet olaraq qalacağını bildirib.
Dövlət başçısı həmçinin Azərbaycanda əlverişli investisiya mühitinin yaradıldığını, Azərbaycan və Britaniya şirkətləri arasındakı böyük qarşılıqlı marağın mövcud olduğunu vurğulayıb və səfirə fəaliyyətində uğurlar arzulayıb.
