Azərbaycanın Qazaxıstandakı yeni təyin olunmuş səfiri Əlimirzamin Əsgərov Astanada Prezident Kasım-Jomart Tokayevə etimadnaməsini təqdim edib.
Mərasim Müstəqillik Sarayında keçirilib. Etimadnamə təqdimatında Əsgərovdən başqa Moldova, Vyetnam, Koreya Respublikası, Cənubi Afrika Respublikası, Slovakiya, Almaniya, Sloveniya və Namibiya səfirləri də iştirak ediblər.
Qazaxıstan Prezidenti Kasım-Jomart Tokayev salamlayıcı nitqində ölkəsinin sülhsevər xarici siyasət kursunu vurğulayıb və Qazaxıstanın sülhün, təhlükəsizliyin və qarşılıqlı əməkdaşlığın möhkəmləndirilməsinə töhfə verməkdə maraqlı olduğunu bildirib.
Tokayev həmçinin təqdim olunmuş diplomatik nümayəndəliklərlə münasibətlərin daha da dərinləşdirilməsi və çoxşaxəli əməkdaşlığın inkişaf etdirilməsində Qazaxıstanın maraqlı olduğunu təsdiqləyib.
Xatırladaq ki, Prezident İlham Əliyev iyulun 28-də Qazaxıstandakı səfir vəzifəsinə dəyişiklik edib. Əlimirzamin Əsgərov bu təyinatdan əvvəl Azərbaycanın Tacikistandakı diplomatik missiyasına rəhbərlik edirdi; vəzifəni ondan əvvəl Ağalar Atamoğlanov icra etmişdi.
