Azərbaycan Prezidenti İlham Əliyev Özbəkistan üçün bərə tikintisinin sürətləndirilməsinin və bu layihəyə prioritet xarakter verilməsinin vacib olduğunu bildirib.
Dövlət başçısı məsələni Azərbaycan və Özbəkistan Ali Dövlətlərarası Şuranın üçüncü iclasında səsləndirib. O, nəqliyyat və tranzit sahəsində müəyyən nəticələrin əldə edildiyini, Özbəkistandan Azərbaycanın ərazisindən keçən yüklərin həcminin artdığını qeyd edib.
Prezident vurğulayıb ki, Özbəkistan üçün bərə inşasını sürətləndirmək lazımdır və bu məsələ barədə Şavkat Mirziyoyevlə danışılıb. İlham Əliyev bildirib ki, məsələ həllini tapıb, ancaq layihəni prioritet siyahıya daxil etmək zəruridir.
O, həmçinin gəmiqayırma zavodunda təxminən on müxtəlif modifikasiyalı — bərə, tanker və quru yük gəmilərinin inşa edildiyini, zavodun hazırda yüz faiz gücü ilə işlədiyini və bu səbəbdən bərə üçün ən uyğun yer olduğunu söyləyib.
Prezident Rəqəmsal İnkişaf və Nəqliyyat Nazirliyinin diqqətini Özbəkistan üçün bərə inşasının prioritet kimi nəzərə alınmasına yönəldib.
