Rusiya Prezidenti Vladimir Putinlə ABŞ lideri Donald Trampın Çin şəhəri Şençjendə keçiriləcək Asiya-Sakit Okean İqtisadi Əməkdaşlıq (APEC) sammiti çərçivəsində üz-üzə gəlmələri mümkün hesab edilir.
Kremlin rəhbərinin köməkçisi Yuri Uşakov bildirib ki, əgər hər iki prezident həmin sammitdə iştirak edəcəksə, onların görüşməsi və dialoq aparması qaçılmaz olacaq. "Sammitə qədər hələ çox vaxt var. Əgər liderlər eyni tədbirdə olacaqlarsa, məncə, onlar qaçılmaz olaraq görüşəcək və danışıqlar aparacaqlar", — Uşakov deyib.
Kremlin nümayəndəsi eyni zamanda qeyd edib ki, indiyədək ABŞ tərəfdən belə bir görüşlə bağlı hər hansı rəsmi siqnal daxil olmayıb.
APEC sammiti bu il 18–19 noyabr tarixlərində Çinin Şençjen şəhərində təşkil olunacaq. Rusiya daha əvvəl Putinin həmin tədbirdə iştirak etməyi planlaşdırdığını bəyan etmişdi.
Tərəflər arasında mümkün görüşün təfərrüatları və gündəliyi barədə isə hələlik əlavə məlumat verilməyib.
