Azərbaycanın Rusiyadakı keçmiş səfiri Ramiz Rizayevin səhhətində ciddi pisləşmə müşahidə olunur.
R.Rizayev özü bildirib ki, bir müddətdir ürək xəstəliyi ağırlaşıb və o, yataq rejimindədir. Hazırda keçmiş diplomatik nümayəndənin müalicəsinin davam etdiyi vurğulanıb.
Ramiz Rizayev 1939-cu il noyabrın 2-də Naxçıvan şəhərində dünyaya gəlib. O, Azərbaycan Dövlət Universitetinin kimya fakültəsini bitirib və neft və neft-kimya sintezi üzrə doktorluq dissertasiyası müdafiə edib.
1983-cü ildə Azərbaycan Milli Elmlər Akademiyasının müxbir üzvü seçilən R.Rizayev 1993-cü il iyulun 3-də Azərbaycanın Rusiya Federasiyasındakı fövqəladə və səlahiyyətli səfiri təyin olunub və 2005-ci ilə qədər bu vəzifəni tutub.
2001-ci ildə o, AMEA-nın həqiqi üzvü seçilib. Uzun müddət Azərbaycan Dövlət Universitetində fiziki-kimya fənnindən dərs deyən alim AMEA-nın Kimya Problemləri İnstitutunda da fəaliyyət göstərib.
R.Rizayevin elmi fəaliyyəti parafin, olefin və aromatik karbohidrogenlərin oksidləşmə reaksiyaları, katalitik sistemlər və neft-kimya prosesləri sahələrinə yönəlib. O, 160 elmi məqalə, 50 müəlliflik işi və 29 patentin müəllifidir, həmçinin 7 elmlər namizədi və 26 elmlər doktorunun elmi rəhbəri olub.
Qeyd edilir ki, sabiq səfir hazırda 87 yaşındadır.
