Müdafiə Nazirliyinin Mərkəzi Hərbi Həkim Komissiyasının keçmiş rəisi Rasim Həsənovun cinayət işi üzrə məhkəmə prosesi başa çatıb.
Bakı Hərbi Məhkəməsində hakim Anar Rzayevin sədrliyi ilə keçirilən iclasda hökm elan edilib. Hökmə görə Həsənovun üzərinə qoyulmuş əsas ittiham 178.3.2-ci maddə üzrə tövsif edilib.
Məhkəmə qərarı ilə ona 15 min manat məbləğində cərimə tətbiq olunub və məhkəmə zalından azadlığa buraxılıb.
İbtidai istintaq sənədlərinə əsasən, Həsənovun 2021–2025-ci illər ərzində tutduğu vəzifələrdən sui‑istifadə etməklə hərbi qulluqçulardan təkrarən müxtəlif məbləğlərdə pul almaqda və vəzifə saxtakarlığı törətməkdə şübhələr müəyyən edilib.
Toplanmış materiallar əsasında ona həmçinin Azərbaycan Respublikası Cinayət Məcəlləsinin 311.3.2, 311.3.3, 313 və 341.2.3-cü maddələri ilə ittihamlar elan edilmiş və istintaq müddətində barəsində həbs qətimkan tədbiri seçilmişdi.
