Baş Prokurorluqda Azərbaycan Respublikasının konstitusiya quruluşunun zorla dəyişdirilməsinə, ərazi bütövlüyünün parçalanmasına, milli nifrət və düşmənçiliyin salınmasına və terrorçuluğa açıq çağırışlar ilə bağlı başlanmış cinayət işi üzrə ibtidai istintaq davam etdirilir.

İstintaq zamanı müəyyən edilib ki, Rusiya Federasiyasının vətəndaşları — “Moskva 24” telekanalının aparıcısı jurnalist Knyazev İvan Andreyeviç, özünü Rusiya Federasiyasında siyasi məsləhətçi və media eksperti kimi təqdim edən Uralov Semyon Sergeyeviç və televiziya jurnalisti, Rusiya Federasiyası nəqliyyat nazirinin müşaviri Çadayev Aleksey Aleksandroviç 14 iyul 2026-cı il tarixdə “YouTube” platformasında “Семён Уралов” kanalında yayımlanan “Чистота понимания” verilişində Azərbaycan Respublikasına qarşı zorakı üsulların tətbiqinə, ölkənin konstitusiya quruluşunun zorla dəyişdirilməsinə və ərazi bütövlüyünün parçalanmasına çağırışlar etdikləri barədə əsaslı şübhələr müəyyən edilib.

Həmçinin 13 avqust 2026-cı il tarixdə eyni kanalda yayımlanan başqa bir verilişdə həmin şəxslərin Azərbaycan əleyhinə zorakı addımların həyata keçirilməsi, konkret şəxslərin fiziki məhvetmə təhlükəsi altında saxlanılması və ünvanlı şəkildə sıradan çıxarılması barədə fikirlər səsləndirmələri nəticəsində terrorçuluğa açıq çağırışlar etməkdə şübhələr ortaya çıxıb.

Faktla bağlı Baş prokurorun qərarı ilə Azərbaycan Respublikası Cinayət Məcəlləsinin 214-2 (terrorçuluğa açıq çağırışlar), 281.2 (dövlət əleyhinə yönələn açıq çağırışlar) və 283.2.1-ci maddələri (milli nifrət və düşmənçiliyin salınması) ilə cinayət işi başlanıb və ibtidai istintaq Baş Prokurorluğun İstintaq idarəsinə həvalə edilib.

Toplanmış sübutlara əsasən Semyon Uralov, İvan Knyazev və Aleksey Çadayev barəsində həmin maddələr üzrə təqsirləndirilən şəxs qismində qərarlar qəbul edilib; onlar ölkə hüdudlarından kənarda olduqları üçün axtarışa verilib və məhkəmənin qərarları ilə barələrində həbs qətimkan tədbiri seçilib.

Baş Prokurorluq təqsirləndirilən şəxslərin tərəfdaş dövlətlərdə müəyyən edilərək tutulması və Azərbaycana təhvil verilməsi məqsədilə aidiyyəti qurumlara müraciətlər ünvanlandığını və onların İnterpol kanalları vasitəsilə beynəlxalq axtarışının təşkilinə dair zəruri tədbirlərin görüldüyünü bildirir.

Qurum Azərbaycan Respublikasının suverenliyi, konstitusiya quruluşu və ərazi bütövlüyünə qarşı yönələn qanunsuz əməllərə qarşı milli qanunvericiliyin və ölkənin üzv olduğu beynəlxalq müqavilələrin tələblərinə uyğun olaraq hüquqi tədbirlərin davam etdiriləcəyini vurğulayır.