Qərb kəşfiyyat dairələrinin sızdırdığı məlumatlara əsasən Moskva İranla hərbi-logistik dəstəyi intensivləşdirib. Xarici medianın məxfi hesabatlara istinadən yaydığı xəbərlərdə bildirilir ki, ABŞ və İsrailin əməliyyatları nəticəsində zərər görmüş İran ordusunun arsenalı şimal qonşusunun yardımı ilə bərpa olunur.
Daşınmalar əsasən pilotsuz uçuş aparatlarının ehtiyat hissələri, yüksək dağıdıcı gücə malik partlayıcı maddələr və müxtəlif döyüş təchizatı üzərində qurulub. Bu yük daşıyan konvoylar Xəzər dənizi kimi kənar donanmaların asan müdaxilə edə bilmədiyi qapalı akvatoriyanı marşrut kimi seçir. Gəmilərin belə bir yol seçməsi sahilyanı üçüncü ölkələrdə suallar doğurur, çünki əvvəllər yaz aylarında xarici qüvvələrin İran sahillərində liman infrastrukturuna zərbələr endirməsinə baxmayaraq tranzit fəaliyyəti bərpa edilib.
Siyasi şərhçi Heydər Oğuz bunun dəniz təhlükəsizliyinə ciddi təsir göstərə biləcəyini vurğulayıb. O qeyd edib ki, şimal və cənub qonşuları arasında hərbi tərəfdaşlıq yeni mərhələyə keçib və əgər əvvəllər Tehran şimala PUA ixrac edirdisə, indi Rusiya İranın zədələnmiş hərbi potensialını bərpa etmək üçün donor rolunu götürüb.
Oğuz həmçinin bildirib ki, bu cür tranzit prosesləri Xəzərdə münaqişə qığılcımlarının yayılma riskini artırır. Onun fikrincə, Azərbaycanın milli təhlükəsizlik mənafeləri üçün vəziyyət həssasdır və hərbi eskalasiya ehtimalları diqqətlə qiymətləndirilməlidir.
Şərhçiyə görə, akvatoriyada hərəkət edən lojistik gəmilərə üçüncü tərəfin birbaşa hərbi zərbə endirməsi ehtimalı aşağıdır, çünki bu, münasibətlərin gərginləşməsinə və beynəlxalq hüququn pozulmasına gətirib çıxara bilər. Lakin limanların və boşaltma məntəqələrinin hədəf alınması təcrübəsi göstərir ki, hərbi yüklər sahildə və ya boşaldılma nöqtələrində ciddi hücum riski altında qalır.
Əsas təhlükə kimi Heydər Oğuz dəniz ticarət yollarının məhdudlaşması və belə hadisələr zamanı meydana çıxacaq böyük ekoloji fəlakətləri göstərir. O, Azərbaycanın dəniz sərhədlərinin monitorinqini artırmalı və qonşuların hərbi avantüralarından uzaq durmaq siyasətini davam etdirməli olduğunu vurğulayıb.
