Paytaxtın şəhərətrafı avtobus xətlərində sərnişinlərin üzləşdiyi problemlər davam edir və 114B marşrutu bu narazılıqların mərkəzindədir.
Marşrut üzrə hərəkət edən avtobusların vəziyyətindən şikayət edən vətəndaş bildirir ki, xəttlə bağlı narahatlıqları aidiyyəti qurumlara — o cümlədən Azərbaycan Yerüstü Nəqliyyat Agentliyinə — təxminən 60–70 dəfə çatdırsa da, indiyədək real nəticə əldə olunmayıb.
Sərnişinlər əsas problemlər kimi avtobusların xətt üzrə gəlmə intervallarının həddindən artıq uzun olmasını və bəzən saatlarla dayanacaqda gözləməyə məcbur edilmələrini göstərirlər. Bundan başqa nəqliyyat vasitələrindəki oturacaqların qırıq və yararsız vəziyyətdə olması yolçular tərəfindən ciddi narazılıq doğurur.
Qeyd olunur ki, normativə əsasən avtobuslar gecə saat 00:00-a qədər işləməlidir, lakin praktikada onlar bəzən axşam saat 23:00-da belə xəttdə tapılmır və gec saatlarda evə qayıdan sakinlər çətinliklə üzləşirlər.
Vətəndaşlar hesab edir ki, yol şəraitinin pis olduğu yerlərə dərhal yeni avtobusların göndərilməsi sərfəli olmaya bilər, çünki belə maşınlar tez sıradan çıxa bilər. Lakin mövcud nəqliyyat vasitələrində təmirdən, təmizlikdən və intervaların tənzimlənməsindən imtina üçün əsas görmürlər.
Həmçinin hər il gediş haqlarının artırılması ilə bağlı narazılıq var: sərnişinlər ödənişlərin yüksəlməsinə baxmayaraq xidmət səviyyəsində heç bir yaxşılaşma müşahidə edilmədiyini bildirirlər və toplanan vəsaitin haraya xərcləndiyi barədə suallar verirlər.
Sərnişinlər aidiyyəti qurumlardan, xüsusilə Azərbaycan Yerüstü Nəqliyyat Agentliyindən 114B marşrutunda yaranmış nöqsanlara sürətlə müdaxilə etməyi, problemlərin aradan qaldırılması üçün təcili tədbirlər görməyi tələb edirlər.
