Aliment vermək öhdəliyi olan şəxslər bəzi hallarda yaranmış borçdan tam və ya qismən azad edilə bilərlər. Bu vəziyyətə dair əsas meyarlar və prosedurlar qanunvericilikdə əksini tapıb.
Vəkil Turan Abdullzadə bildirib ki, Ailə Məcəlləsinin 107-ci maddəsinə əsasən müəyyən hallarda aliment öhdəliyindən azadetmə mümkündür. Əvvəlcə tərəflər arasında alimentin ödənilməsi sazişlə tənzimlənərsə, tərəflərin qarşılıqlı razılığı ilə borcun tam və ya qismən ləğv edilməsi mümkündür.
Bundan başqa, alimentdən azad olunma məhkəmə yolu ilə də həyata keçirilə bilər. Məhkəmə aliment ödəyən şəxsin borcun xəstəlik və ya digər üzrlü səbəblərdən yarandığını və bu səbəbdən onun ailə və maddi vəziyyətinin borcu ödəməyə imkan vermədiyini müəyyən edərsə, borcu tam və ya qismən ləğv edə bilər.
Hüquqşünas həmçinin Ailə Məcəlləsinin 82-ci maddəsinə diqqət çəkib. Məhkəmə valideynlərin valideynlik vəzifələrini yerinə yetirmədiyini müəyyən etdikdə, uşaqlar əmək qabiliyyəti olmayan və maddi dəstəyə ehtiyacı olan valideynlərini saxlamaq öhdəliyindən azad edilə bilərlər.
Digər tərəfdən, valideynlik hüququndan məhrum edilmiş şəxslərə münasibətdə vəziyyət fərqlidir: belə şəxslər valideynlik hüququnu itirsələr də, uşağın saxlanılması öhdəliyindən azad edilmirlər və aliment öhdəliyi davam edir.
Nəticə etibarilə, alimentdən azad olunma yalnız qanunda göstərilən hallar əsasında mümkündür; bunun üçün tərəflərin razılığı, məhkəmənin müəyyən etdiyi üzrlü səbəblər və bəzi xüsusi ailə-hüquqi hallar nəzərə alınır. Valideynlik hüquqlarından məhrum edilmə isə aliment ödəmək öhdəliyini aradan qaldırmır.
