Qazaxıstanın Almatı vilayətində ərini öldürməkdə təqsirləndirilən, çoxuşaqlı və hamilə qadın məhkəmə tərəfindən bəraət alıb.
Məhkəmə qadının ərinə bıçaqla xəsarət yetirməsini özünümüdafiə kimi qiymətləndirib. Hadisə zamanı qadın artıq hamiləliyinin 9-cu ayında olub.
İstintaq materiallarına görə, qadın uzun illər ərinin məişət zorakılığına məruz qalıb. Məhkəmə məlumatında bildirilib ki, kişi onu mütəmadi olaraq döyüb, boğub və qış aylarında körpəsi ilə birlikdə evdən qovub; həmçinin onun başqa qadınla münasibəti olduğu və qadını dəri xəstəliklərinə yoluxdurduğu qeyd edilib.
Vəkil Qalım Nurpeisovun bildirdiyinə görə, insident mayın 1-də ailə münaqişəsi zamanı baş verib. Yaralanmadan əvvəl ərinin onu qasıq nahiyəsindən təpiklə vurması üzündən qadın evdən çıxaraq kömək axtarıb, lakin heç kim polisin çağırılmasını təmin etməyib.
Sonradan o, qonşuların evindən götürdüyü mətbəx bıçağı ilə geri dönüb. Vəkilin dediyinə görə, ər-arvad arasında mübahisə davam edib və kişinin yenidən onu döyəcəyini deməsi qadını bıçaqla müdafiə etməyə məcbur edib.
Məhkəmədə qeyd olunub ki, qadın ərinə ürək nahiyəsindən zərbə endirib və kişi qan itkisindən dünyasını dəyişib.
Hüquq müdafiəçiləri uzunmüddətli məişət zorakılığının qadınları özlərinin və övladlarının təhlükəsizliyini təmin etmək məqsədilə son həddə addım atmağa sövq edə biləcəyini vurğulayıb.
Vəkil Qalım Nurpeisov bəraət hökmünü cəmiyyətdə zorakılığa qarşı dözümsüzlüyün formalaşmasının göstəricisi kimi dəyərləndirib.
