Daxili İşlər Nazirliyinin Kibercinayətkarlıqla Mübarizə Baş İdarəsi saxta sosial şəbəkə profilləri və “WhatsApp” ani mesajlaşma hesablarından istifadə olunmaqla törədilən ciberdələduzluqlarla bağlı əməliyyat həyata keçirib.
Tədbir çərçivəsində xaricdə fəaliyyət göstərən kibercinayətkar qruplarla əməkdaşlıqda şübhəli bilinən Fərid Əliyev, Asiman Zeynalov, Tofiq Əliyev, Fərid Atakişiyev, Röyal Abdullayev, Anar Məmmədov, Rəşad Hacıyev və Həmid Əliyev saxlanılıb.
Araşdırma zamanı məlum olub ki, saxlanılan şəxslər xarici qrupların üzvləri ilə əlaqə saxlayaraq onlara yerli mobil operatorlara aid elektron nömrələr, qanunsuz fəaliyyətlərdə istifadə edilən bank kartları və digər məlumatları veriblər. Bu vasitələrlə onlayn əməliyyatlar təşkil edilib və qeyd edilən cinayət əməllərinin törədilməsində həmin nömrə və kartlardan istifadə olunub.
Əməliyyat-istintaq materiallarında göstərilib ki, qanunsuz yolla əldə edilmiş 2 mindən çox bank kartı və elektron mobil nömrənin cinayətkar əməllərə yönləndirildiyi aşkarlanıb. Həmçinin həmin resursların bir hissəsinin onlayn qumar və kazino oyunlarının təşkilində tətbiq edildiyi müəyyən edilib.
Hazırda saxlanılan şəxslərin ətrafında əməliyyat-istintaq və əməliyyat-texniki tədbirlər davam etdirilir. Xaricdə fəaliyyət göstərən kibercinayətkar qrupların digər iştirakçılarının müəyyən olunaraq məsuliyyətə cəlb edilməsi istiqamətində də tədbirlər aparılır.
Vətəndaşlara bir daha xatırladılır ki, bank rekvizitləri və mobil nömrələr üçüncü şəxslərə cinayət məqsədilə təqdim edilməməlidir. Əgər bank kartından və ya mobil nömrədən şübhəli istifadənin aşkarlandığını, hesabınıza mənbəyi şübhəli vəsaitlərin köçürüldüyünü və ya mobil nömrənizə şübhəli SMS-lər gəldiyini görsəniz, dərhal polis orqanlarına məlumat verməyiniz tövsiyə olunur.
