TRT Haber-in məlumatına görə, İran İnqilab Keşikçiləri Ordusunun Dəniz Qüvvələri son 24 saat ərzində Hürmüz Boğazının cənubunda Tehran tərəfindən qadağan edilmiş “icazəsiz marşrut”dan keçməyə çalışan üç neft tankerinin dəniz mayınlarına dəyərək partladığını və yanğınların baş verdiyini açıqlayıb.
Açıqlamada tankerlərin radar və naviqasiya sistemlərini söndürdükləri və İnqilab Keşikçiləri Dəniz Qüvvələrinin xəbərdarlıqlarına məhəl qoymayaraq sözügedən marşruta daxil olmağa cəhd etdikləri iddia edilib.
Bildirilib ki, həmin marşrut dəniz mayınları ilə əhatələnib və gəmi sahibləri və ekipajlar bu marşrutu istifadə edərkən yarana biləcək nəticələrə görə məsuliyyət daşıyacaqlar. Həmçinin Amerika Birləşmiş Ştatlarının Mərkəzi Komandanlığının (CENTCOM) açıqlamalarına etibar edilməməsi tələb edilib.
Açıqlamada əlavə edilib ki, Hürmüz Boğazında qoyulmuş qaydaları gözardı edən və ABŞ ordusunun dəstəyi ilə həyata keçirilən “hər cür təhrikedici hərəkətə” qətiyyətlə cavab veriləcək.
