Son on gündə Türkiyə, Pakistan və Səudiyyə Ərəbistanı arasında imzalanmış Məkkə birgə müdafiə müqaviləsi həm regional, həm də qlobal gündəmin əsas mövzularından birinə çevrilib. ABŞ Prezidenti Donald Tramp müqaviləni alqışlayaraq onu mühüm addım kimi dəyərləndirib.
Müqavilənin ölkələrin milli müdafiəsində oynayacağı rol ilə bağlı müzakirələr davam edir. Pakistanın baş naziri Şahbaz Şərif Trampın açıqlamasını paylaşaraq təşəkkürünü bildirib və sənədin həm üzv ölkələrin, həm də regionun müdafiəsində konstruktiv təsir göstərəcəyini vurğulayıb.
Məkkə müqaviləsi həmçinin Türkiyə Prezidenti Rəcəb Tayyib Ərdoğanın Trampla telefon danışığında əsas mövzulardan biri olub. Türkiyə prezidenti müqaviləyə dair açıqlamalarında onun dünyaya əhəmiyyətli mesaj ötürdüyünü qeyd edib.
Beynəlxalq mediada müxtəlif mövqelərdən yazılan təhlillər geniş yer alır. Sazişin İrana münasibəti uzun müddətdir ekspertlərin ən çox diqqət yetirdiyi məsələdir. Müqaviləni imzalayan tərəflər sənədin İrana qarşı yönəlmədiyini bildirib, lakin bəzi analitiklər bunun İrana qarşı təsir göstərə biləcəyini əsaslandırmağa çalışır.
İranda müqaviləyə qarşı ümumilikdə daha sakit və ölçülü münasibətin üstünlük təşkil etdiyi görünür; bəzi dairələr sənədi müsbət qiymətləndirir. Eyni zamanda, müqavilənin arxasında İrana qarşı gizli niyyətlərin və mümkün təhdidlərin olması barədə iddialar səsləndirilir. Bununla belə, Tehran tərəfdən münasibətlərin daha çox regionun təhlükəsizlik arxitekturasında baş verə biləcək dəyişikliklərə fokuslandığı müşahidə olunur.
