Yeni tədris ilinin yaxınlaşması ilə valideynlərin əsas xərclərindən biri məktəbli formalarının alınmasıdır. Həmin geyimlərin qiyməti parçanın növü və keyfiyyəti, istehsal xərci, ölçü, tikiş və digər amillərə görə dəyişir.
İqtisadçı Razi Abbasbəyli bildirir ki, bazarda yerli, Çin və Türkiyə istehsalı məktəbli formaları satışdadır. Onun hesablamasına görə, bir şagird üçün tam məktəbli forması dəsti təxminən 80–100 manat aralığındadır.
Abbasbəyli qeyd edir ki, üç uşaq olan ailələrdə yalnız forma xərcləri təxminən 300 manat təşkil edir. Valideynlər geyim alarkən tikiş və sapların möhkəmliyinə diqqət etməlidirlər, çünki çox ucuz məhsullar bir neçə dəfə yuyulduqdan sonra deformasiya ola bilər.
Mütəxəssis əlavə edir ki, daha keyfiyyətli formalar sertifikatlı olur və alınarkən bununla maraqlanmaq məsləhətdir. Orta səviyyəli məhsullar əsasən yerli istehsal hesab olunur, yüksək keyfiyyətli və bahalı seçimlər Türkiyə istehsalına aid edilir, aşağı qiymətli və daha zəif keyfiyyətli variantlar isə Çindən idxal olunur.
Bu səbəbdən valideynlər büdcə qənaəti məqsədilə çox ucuz məhsul almaq istəyəndə, sonradan yenidən geyim və digər ləvazimatlar almaq məcburiyyətində qala bilərlər. Məhsulun hətta düymələrinin tikişinə qədər diqqət yetirmək tövsiyə olunur ki, sonrakı mərhələdə əlavə xərc yaranmasın.
Abbasbəyli hesab edir ki, bir şagird üçün yalnız forma 100 manatdırsa, çanta, ləvazimatlar və ayaqqabı daxil ediləndə ümumi ilkin xərclər təxminən 200–250 manat ola bilər. Ailədə uşaq sayı çox olduqda bu məbləğ artır və valideynlər daha ucuz seçimə üz tuta bilirlər, lakin ucuz məhsullar uzunömürlü olmur.
Nəticədə iqtisadçı valideynlərə məsləhət verir ki, daha az xərclə qənaət etmək üçün çox ucuz məhsullara üstünlük verməsinlər, çünki keyfiyyətsiz alış sonradan yenidən xərclərə səbəb ola bilər.
