Metronun xətlərin ayrılması layihəsi çərçivəsində “28 May” və “Nizami” stansiyaları arasındakı qatarlar müvəqqəti dayandırılıb və bu səbəbdən sərnişin daşınmasını təmin etmək üçün yeni ekspres avtobuslar işə salınıb.
Yerüstü Nəqliyyat Agentliyinin təşkilatçılığı ilə ümumilikdə 6 ekspres marşrut istifadəyə verilib. Yeni marşrutlar metronun alternativ hərəkətini əvəzləmək məqsədi daşıyır və sərnişinlərin daşınması üçün əlavə imkanlar yaradacaq.
“28 May” stansiyasının qarşısında M1 ekspres avtobusları fəaliyyət göstərəcək. Həmçinin “İnşaatçılar” və “20 Yanvar” stansiyalarından başlayacaq M2 və M3 nömrəli ekspreslər də həmin məntəqədə sərnişinləri mindirib-düşürəcəklər. Layihə müddətində 20 müntəzəm marşrutda isə avtobusların sayı artırılacaq.
“Gənclik” stansiyasına gedən xətlərdə başlanğıcını “Elmlər Akademiyası” stansiyasından götürən M6 ekspresləri ilə yanaşı, “20 Yanvar” stansiyasından yola çıxan M5 avtobusları da xidmət göstərəcək. M2 nömrəli marşrut “İnşaatçılar–Nizami” və “28 May” stansiyaları arasında hərəkət edəcək.
Abbas Mirzə Şərifzadə küçəsindən, yəni “İnşaatçılar” metrosunun qarşısından yola düşəcək avtobuslar Nəsrəddin Tusi klinikası istiqamətində davam edəcəklər. Sərnişin axınının sıx müşahidə olunduğu “20 Yanvar” stansiyası ətrafında üç ekspres xətti təşkil edilib.
M4 nömrəli ekspreslər “20 Yanvar” stansiyasından çıxaraq son dayanacaq kimi Alov parkının önündə saxlayacaqlar. Layihənin icrası dövründə “28 May”, “Elmlər Akademiyası”, “İnşaatçılar” və “20 Yanvar” stansiyalarının qarşısında nəqliyyat könüllüləri sərnişinlərə istiqamət vermək məqsədilə fəaliyyət göstərəcəklər.
Avtobuslar metronun iş rejiminə uyğun olaraq səhər saat 06:00-dan gecə yarısına, yəni 00:00-dək hərəkət edəcəklər.
