Azərbaycanın Milli Qəhrəmanı, şəhid Şükür Həmidovun qızı Əzizə Həmidovanın nikah mərasimi ötən gün keçirilib və o, Nicat adlı bəylə ailə həyatı qurub.
Könül Həmidova bildirib ki, qızının toyunu təşkil etmək həm analıq məsuliyyəti, həm də mərasimi Şükür Həmidovun adına layiq tutmaq baxımından onun üçün xüsusi həssaslıq tələb edib. O, əlinə düşəni etməyə çalışdığını və həm valideyn, həm də Şükür müəllimin yükünü öz üzərinə götürdüyünü vurğulayıb.
Toyun hazırlanmasında Milli Qəhrəmanın silahdaşları, dostları, qohumları və yaxınlarının ona böyük mənəvi dəstək göstərdiyini söyləyib. Könül Həmidova bir qadının təkbaşına belə bir məsuliyyəti daşımasının çətin olduğunu qeyd edib və köməyi üçün hər kəsə minnətdarlığını çatdırıb.
O, mərasimdə çoxsaylı qonaqların iştirak etdiyini, yalnız yaxınların deyil, həmçinin tanımadığı şəxslərin və müxtəlif vəzifələrdə çalışan insanların da tədbirdə olduğunu deyib. Ad çəkmək istəmədiyini, çünki kimisə unutmaqdan ehtiyat etdiyini əlavə edib.
Göstərilən diqqəti borc hesab etmədiyini vurğulayan Könül Həmidova bunu hörmət və dəyərin əks olunması kimi qəbul etdiyini bildirib: bəzən belə rəftarın borc olduğu deyilsə də, o, bunu insanlardan gələn hörmət kimi qiymətləndirir.
Eyni zamanda, qızının həyat yoldaşı ilə tanışlığından danışan Könül Həmidova bildirib ki, onların tanışı fotostudiyada başlayıb; Nicat Əzizəni orada görüb və sonra rəfiqələri vasitəsilə onunla maraqlanıb. O, Əzizənin atasının kimliyini ön plana çıxarmadığını, tanıyanların bunu çox vaxt sonradan öyrəndiyini qeyd edib.
Könül Həmidova toy mərasimində şəhid ailələrinin də iştirak etdiyini və onların tədbirdə başlanğıcdan sonadək yanlarında olduqlarını bildirib, həmçinin onlara təşəkkürünü çatdırıb.
Qeyd edək ki, Şükür Həmidov Aprel döyüşlərində Lələtəpə uğrunda gedən əməliyyatda şücaət göstərib və Prezident İlham Əliyevin 20 aprel 2016-cı il tarixli sərəncamı ilə Azərbaycanın Milli Qəhrəmanı adına (sağlığında) layiq görülüb. O, Vətən Müharibəsində Qubadlı rayonunun azadlığı uğrunda gedən döyüşlərdə şəhid olub.
