Mingəçevirdə şəhid Mənsur Fərruxov küçəsi ilə yaxınlıqdakı Günəş küçəsində yolların pis durumda olduğu bildirilir.
Şəhər sakinləri müraciətlərində bu küçələrdə uzun müddətdir təmir işlərinin aparılmadığını deyirlər. Onların sözlərinə görə, asfaltdan qopan daşlar avtomobillərin təkərləri altında səpələnir və bu, həm nəqliyyat vasitələri, həm də piyadalar üçün təhlükə yaradır.
Müraciətdə vurğulanır ki, şəhid Mənsur Fərruxovun atası da yolun vəziyyətindən narahatdır və küçədən keçərkən vəziyyəti görüb hüzünləndiyini dəfələrlə ifadə edib. Sakinlər aidiyyəti qurumların problemə laqeyd yanaşmasını tənqid edirlər.
Eyni zamanda, müraciətdə adıçəkilən küçələrdə kanalizasiya sisteminin tam qurulmadığı iddia olunur və bunun da yaşayış üçün əlavə əngəl yaratdığı qeyd edilir.
Sakinlər məsələni ictimailəşdirərək aidiyyəti qurumlardan küçələrin təmiri və kanalizasiya işlərinin sürətləndirilməsini xahiş edirlər, həmçinin şəhidin xatirəsinə hörmət məqsədilə təmir işlərinin prioritetləşdirilməsini tələb edirlər.
Qeyd olunur ki, məqalədə yer alan məlumatlar sakinlərin müraciətinə əsaslanır. Məsələ ilə bağlı aidiyyəti qurumların açıqlaması dərc edilməyə hazırdır.
