Rusiyada 2026-cı il 1 sentyabrdan etibarən Moskva şəhərinə və Moskva vilayətinə vizasız gələn əcnəbi vətəndaşların “Amina” adlı mobil tətbiqi quraşdırmaları məcburi olacaq.
Tətbiq miqrantların ölkəyə daxil olması və daxili hərəkətlərinin rəqəmsal nəzarət altında saxlanması üçün nəzərdə tutulub. Qaydaya görə, istifadəçilər tətbiq vasitəsilə yaşayış ünvanlarını və ünvan dəyişikliklərini daxili işlər orqanlarına bildirməlidirlər.
Qeyd edilir ki, “Amina” 2025-ci ilin sentyabrından etibarən Moskvaya və onun vilayətinə iş məqsədilə gələn əcnəbilər üçün zəruri olub. 2026-cı ilin sentyabrından başlayaraq isə iş məqsədi daşımayan və ölkədə 90 gündən artıq qalacaq şəxslər üçün də tətbiqə tələbat tətbiq ediləcək.
Yeni tənzimləmə Moskva və Moskva vilayətində təhsil alan tələbələrə və əmək miqrantlarının ailə üzvlərinə də şamil ediləcək. Siyahıda Ermənistan, Azərbaycan, Gürcüstan, Qazaxıstan, Qırğızıstan, Moldova, Tacikistan, Özbəkistan və Ukrayna vətəndaşları yer alır. Bu, Rusiyaya gedən və 90 gündən artıq qalmağı planlaşdıran azərbaycanlı tələbə və miqrant ailə üzvlərinin də tətbiqdən istifadə etməli olacağı deməkdir.
Tələbə, ailə üzvü və digər kateqoriyalara daxil olan şəxslərdən tətbiq vasitəsilə yaşayış ünvanı və geolokasiya məlumatları təqdim etmələri tələb olunur. Eyni zamanda bəzi qruplar bu tələbdən azaddır: Belarus vətəndaşları, yeniyetmələr, diplomatlar və onların ailə üzvləri, eləcə də beynəlxalq təşkilatların əməkdaşları tətbiqin məcburi tətbiqinə daxil edilməyəcək.
Rusiya Daxili İşlər Nazirliyinin açıqlamasında bildirilir ki, 2025-ci ilin dekabrında Moskvada 139 mindən çox miqrant “Amina” vasitəsilə ötürülməli olan geolokasiya məlumatlarını təqdim etmədikləri üçün miqrasiya qeydiyyatından çıxarılıb.
