“Nizami” və “28 May” metro stansiyaları arasındakı qatar hərəkətinin dayandırılması sərnişinlərin gündəlik gediş-gəlişinə ciddi təsir göstərib. Bu səbəbdən həmin xətt üzrə əlavə ekspres avtobuslar fəaliyyətə başlayıb.
Əvəzedici nəqliyyatın işləməsinə baxmayaraq, avtobusların ödənişli olması sərnişinlər arasında sual yaradıb: alternativ nəqliyyatdan istifadə edənlər üçün güzəştli tarif tətbiq ediləcəkmi?
Liberal İqtisadçılar Mərkəzinin sədri Akif Nəsirli mövzu ilə bağlı bildirib ki, hazırda həmin avtobuslarda güzəştin tətbiq edilməsinə dair rəsmi qərar yoxdur. O, Bakı Metropoliteninin nəşr etdikləri məlumatlara istinad edərək əlavə ekspres avtobusların ödənişli olduğunu vurğulayıb.
Nəsirli qeyd edib ki, əvəzedici avtobuslardan istifadə sərnişinlərin nəqliyyat xərcini artıra bilər, çünki əvvəllər bir gediş haqqı ilə tamamlanan marşrut üçün indi əlavə ödəniş tələb olunur. Onun fikrincə, belə vəziyyətdə vahid bilet və ya transfer güzəştinin tətbiqi daha məqsədəuyğun olar.
Ekspert nümunə olaraq metrodan enən sərnişinin müəyyən müddət ərzində eyni istiqamətdə hərəkət edən əvəzedici avtobusdan əlavə ödənişsiz istifadə etməsini göstərib. Belə mexanizm həm sərnişinin üzərinə düşən maliyyə yükünü azaldar, həm də texniki fasilənin yaratdığı narahatlığın kompensasiyası baxımından ədalətli hesab edilə bilər.
O həmçinin problemin uzunmüddətli xarakter daşımasının məsələnin aktuallığını artırdığını vurğulayıb: bu məhdudiyyətin 11 ay müddətində davam edəcəyi nəzərə alınmalıdır, ona görə tələbələr və gündəlik işə gedib-gələnlər üçün davamlı güzəşt mexanizminin tətbiqi sosial baxımdan məqsədəuyğun olardı.
Hazırda, Nəsirlinin bildirdiyi kimi, əvəzedici avtobuslardan istifadə edənlər üçün xüsusi güzəşt və ya vahid tariflə bağlı rəsmi qərar mövcud deyil. Beləliklə, qatar fasiləsi səbəbindən alternativ nəqliyyata keçmək sərnişinlərə əlavə xərclər gətirir və transfer güzəştinin tətbiqi təklif olunur.
