Rusiya qüvvələri Xarkov vilayətinin Çuquevski rayonunda yerləşən Peçeneqi qəsəbəsinə raket zərbəsi endirib.
Hadisə nəticəsində 10 nəfər həyatını itirib, 17 nəfər müxtəlif dərəcəli xəsarətlər alıb. Regional hərbi administrasiyanın rəhbəri Oleq Sinequbov yaralıların tibbi yardım aldıqlarını bildirib.
Məlumata görə, hücum raketlərlə həyata keçirilib. Zərbələr on fərdi evə, bir kafeyə, poçt şöbəsinə, mağazaya və ən azı yeddi avtomobilə ziyan vurub.
Xarkov Vilayət Prokurorluğu açıqlayıb ki, Rusiyanın hücumu yerli vaxtla təxminən səhər saat 8:40-da başlayıb. Prokurorluq faktla bağlı Ukrayna Cinayət Məcəlləsinin 438-ci maddəsinin 2-ci hissəsi — müharibə cinayəti — üzrə məhkəməyəqədər istintaq başladıb.
Raket zərbələri qəsəbənin mərkəzi hissəsini, kafelərin, poçt şöbəsinin və mağazaların yerləşdiyi ərazini hədəf alıb. Dağıntılar hələ də təmizləndiyindən ölən və yaralananların dəqiq sayı dəqiqləşdirilməyib.
Bildirilir ki, zərbələr bir-birindən təxminən 50 metr radiusda həyata keçirilib və onlardan biri kafeyə dəyib.
Ukrayna Silahlı Qüvvələri eyni zamanda bildirib ki, Rusiya gecə ərzində Ukraynaya təxminən 150 pilotsuz uçan aparat atıb.
