Yunanıstanın Egey dənizində yerləşən Sifnos adasında özəl bir helikopter qəzaya uğrayıb.
Hadisə adanın Tolos adlı ərazisində baş verib. Helikopter Tolosdakı helipadadan qalxdıqdan dərhal sonra yerə çırpılıb.
İlkin məlumatlara görə, hava vasitəsinin göyərtəsində iki kişi və bir qadın olub. Bütün sərnişinlər və pilot hadisə yerində həyat əlamətləri olmadan aşkar ediliblər.
Qəza nəticəsində hava aparatı yaşayış massivinə düşsə də, heç bir ev zərər görməyib.
Çırpılma sonrası helikopterdə yanğın başlayıb və yanğınsöndürmə briqadaları alovu söndürmək üçün tədbirlər həyata keçirirlər.
Pilotun və sərnişinlərin şəxsiyyəti ilə bağlı, həmçinin vətəndaşlıqları barədə hələlik rəsmi məlumat verilməyib.
Hadisə ilə bağlı müvafiq qurumlar tərəfindən araşdırma aparılır.
