Azərbaycanda çıxarışı olmayan evlərin sığortalanması mümkün olub-olmadığı və bu halda hansı sənədlərin tələb edildiyi mülkiyyətçilər üçün aktual suallardır. KONKRET.az-a danışan sığorta eksperti Emil Ağabağırov bildirib ki, çıxarışı olmayan evlərin sığortalanması üçün tikiliyə dair hər hansı sənədin mövcudluğu vacibdir.
Ekspertin sözlərinə görə, alqı-satqı müqaviləsi, order, qeydiyyat vəsiqəsi, məhkəmə qərarı və ya etibarnamə kimi sənədlər evin sığortalanması məsələsinə baxılması üçün əsas ola bilər. O, əlavə edib ki, yalnız torpaq sahəsinə dair çıxarışın olması həmin ərazidə yerləşən evin sığortalanması üçün kifayət etmir. Çünki torpağın çıxarışı yalnız torpaq sahəsinə aiddir və üzərindəki tikilinin hüquqi vəziyyətini təsdiqləmir.
Ekspert vurğulayır ki, torpağın çıxarışı varsa belə, onun üzərində yerləşən fərdi yaşayış evini və ya mənzili sığortalamaq mümkün deyil; sığorta üçün həmin tikiliyə aid sənədlər tələb olunur. Bu prinsip həm icbari, həm də könüllü əmlak sığortasına şamil olunur.
Nəticə etibarilə çıxarışın olmaması evin sığortalanması imkanını avtomatik olaraq istisna etmir. Lakin tikiliyə dair müvafiq sənədlərin mövcudluğu və sığortaçı tərəfindən qəbul edilməsi zəruri şərtdir.
