Kommersant-ın məlumatına görə, sentyabr ayı nəticələrinə görə Rusiya Türkiyədən sitrus məhsullarının idxalını 638,8 min dollar səviyyəsinə yüksəldib ki, bu da keçən ilin eyni dövründəki 6,2 min dollara nisbətən 100 dəfə çoxdur.
Türkiyə gömrük statistikası göstərir ki, ötən ayın göstəricisi son beş ilin aylıq ortalamasından da yüksəkdir. 2021–2022-ci illərdə tədarük artımı müşahidə olunub, lakin 2023-cü ildə azalma qeydə alınmışdı. 2024-cü ildə isə idxalda yenidən sıçrayış baş verərək 105 dəfə artım olmuşdu.
Məlumatda bildirilir ki, keçən ilin avqust ayında Rusiyaya sitrus tədarükü demək olar ki, olmayıb, sentyabrda isə tədarük yalnız 12 dollar təşkil etmişdi.
Türkiyənin Rusiyadakı səfiri Tanju Bilgiç bildirib ki, Türkiyə və Rusiya arasındakı ticarət dövriyyəsi ildə təxminən 50 milyard dollar qiymətləndirilir və tərəflər bu həcmi artırmaq üzərində işləyirlər. 2025-ci ilin yekunlarına görə iki ölkə arasında kənd təsərrüfatı məhsullarının ticarət dövriyyəsi 5,5% artıb.
Hesabatda vurğulanır ki, Rusiya adətən dənli və paxlalı bitkilər, eləcə də yağ-sənaye məhsulları tədarük edir, Türkiyədən isə Rusiyaya meyvə və tərəvəzlər daxil olur.
