İstehlak etdiyiniz məhsullar qan təzyiqinin idarə olunmasında və ümumi ürək sağlamlığında mühüm rol oynayır. Müəyyən qidaların gündəlik rasiona daxil edilməsi təzyiqin təbii yollarla aşağı salınmasına kömək edən sadə addımlardandır.
Kardioloq, tibb elmləri doktoru Çen-Han Çen bildirir ki, bir gecədə qan təzyiqini kəskin şəkildə aşağı salacaq möcüzəvi qida yoxdur. Onun sözlərinə görə, təzyiqin uzunmüddətli nəzarəti balanslı, ürək üçün faydalı qidalanma rejiminin formalaşdırılması nəticəsində əldə edilir.
Həkim boşqabı bol meyvə və tərəvəz, yağsız zülal və tam taxıllı məhsullarla doldurmağı tövsiyə edir. Qan təzyiqini normada saxlamaq üçün Aralıq dənizi pəhrizinə və ya DASH (hipertoniyanın qarşısının alınması üçün pəhriz yanaşmaları) modelinə riayət etmək məqsədəuyğundur.
Paxlalıların üstünlükləri barədə kardioloq Kevin Heder qeyd edir ki, əgər yalnız bir məhsul seçməli olsaydı, o, qara lobya, mərcimək və noxudu məsləhət görərdi. Bu məhsullar kalium, maqnezium və liflə zəngindir; kalium natriumun təsirlərini balanslaşdırmağa yardım edir, lif isə ürək sağlamlığının yaxşılaşması ilə əlaqələndirilir.
