Samux rayonunda qarayara ilə bağlı epidemioloji vəziyyət sabit olaraq qiymətləndirilir. Yeni yoluxma hallarına rastlanmır və xəstəliyin əhali arasında yayılması müşahidə olunmur.
Səhiyyə Nazirliyindən bildirilib ki, Alıuşağı kəndində qarayaraya dair hadisə qeydə alındıqdan dərhal sonra müvafiq qurumlar zəruri epidemioloji və profilaktik tədbirləri həyata keçirib.
Epidemioloji araşdırmalar nəticəsində xəstə ilə təmasda olmuş şəxslər müəyyənləşdirilərək tibbi nəzarətə götürülüb və onların laborator müayinələri aparılıb. Hadisənin baş verdiyi təsərrüfatda epizootoloji və epidemioloji yoxlamalar yerinə yetirilib, laborator analiz üçün nümunələr götürülüb.
Müşahidə və laborator nəticələrə əsasən, 15 avqust 2026-cı il tarixindən etibarən yeni yoluxma qeydə alınmayıb. Xəstəliyi aşkarlanmış şəxslər müvafiq tibb müəssisəsində müalicə alır, onlarla təmasda olmuş şəxslər üzrə isə tədbirlər davam etdirilib və yeni yoluxma halı müəyyən edilməyib.
Hadisə ilə əlaqədar aidiyyəti qurumlar birgə tədbirlər görərək xəstəliyin yayılmasının qarşısını almağa yönəlmiş profilaktik və əks-epidemik işləri həyata keçiriblər. Qarayara əsasən xəstə və ya tələf olmuş heyvanlar, onların yoluxmuş toxumaları və məhsulları ilə təmas nəticəsində insanlara keçən zoonoz xəstəlikdir; insandan-insana ötürülmə halları isə nadir olaraq müşahidə edilir.
Səhiyyə Nazirliyi epidemioloji vəziyyətə nəzarəti davam etdirir.
Digər tərəfdən, TƏBİB 24 yaşlı hamilə qadının ölümü barədə məlumat yayıb. Bildirilib ki, Tovuz rayon sakini Lalə Quliyeva Sabunçu Tibb Mərkəzinə 20 avqust 2026-cı il tarixində saat 22:30 radələrində ölü vəziyyətdə daxil olub.
Meyit məhkəmə-tibbi ekspertiza və patoloji anatomiya birliyinə təhvil verilib və hadisə ilə bağlı müvafiq prosedurlar aparılır.
