Bakıda həyat yoldaşına mütəmadi olaraq fiziki və psixoloji zorakılıq etdiyi iddia edilən şəxsin barəsindəki cinayət işi xitam verilib. Məhkəmə tərəflərin barışmasını və ziyanın ödənilməsini əsas götürərək təqsiri ilə bağlı məsuliyyətindən azad edilməsinə qərar verib.
Xəzər Rayon Məhkəməsində keçirilən iclasda hakim Toğrul Məmmədovun sədrliyi ilə baxılan iş üzrə müttəhim Cinayət Məcəlləsinin 133.1-ci maddəsi ilə ittiham olunmuşdu. Qərarda bildirilir ki, kişi müxtəlif zamanlarda birgə yaşadıqları mənzildə həyat yoldaşına qarşı fiziki zorakılıq və psixoloji əzab vermə hallarını törədib. Zərərçəkən qadın isə bəzən həyat yoldaşının TikTok-dan istifadə etməsini mübahisə predmetinə çevirdiyini deyib.
İş materiallarına əsasən, təqsirləndirilən şəxs qadını iradəsinə zidd olaraq hotelə aparıb, hicabını açmağa və TikTok-da canlı yayıma qoşulmağa məcbur edib. Bundan sonra onun hesabından başqalarına intim məzmunlu mesajlar yazdığı bildirilir. Qadının sözlərinə görə, işləməsinə icazə vermədiyi üçün gəlir əldə etmə məqsədilə canlı yayımlar açmağa başlayıb. Hökmdə qeyd olunur ki, kişi dəfələrlə telefondan məhrum edib, xəsarət yetirib və hədələyib.
Hadisələr barədə qadın yaxınlarının evinə gəldikdən sonra polisə şikayət edilib. Məhkəmə-tibbi ekspertizası nəticəsində bədənində müxtəlif xəsarətlər aşkarlanıb.
Məhkəmədə təqsirləndirilən şəxs özünü qismən təqsirli bilib və həyat yoldaşını bir-neçə dəfə vurduğunu boynuna alıb. İclasda hər iki tərəf barışdıqlarını bildirərək işin xitam verilməsini istəyib. Zərərçəkmiş tərəf dəymiş ziyanın ödənildiyini və qarşı tərəfə qarşı şikayətinin olmadığını söyləyib.
29 oktyabr 2026-cı il tarixli qərarla kişi Cinayət Məcəlləsinin 73.2-ci maddəsinə əsasən cinayət məsuliyyətindən azad olunub, barəsindəki cinayət təqibinə və icraata xitam verilib. Eyni zamanda onun yaşadığı yer üzrə qoyulmuş iltizam qətimkan tədbiri də ləğv edilib.
