Qafqaz News Bakupost.az-a istinadən xəbər verir ki, süni intellekt agenti epilepsiyalı siçan üzərində beyin əməliyyatını özü planlaşdırıb və robotik qolları idarə edərək həyata keçirib. Exin Therapeutics şirkətinin rəhbəri Qabriel Okana-Santero açıqlamasında bildirir ki, təcrübədə süni intellekt 19 gen terapiyası variantı arasından müalicə üsulunu seçib və müdaxilə ediləcək beyin hissəsi ilə inyeksiya koordinatlarını müəyyənləşdirib. Əməliyyat zamanı sistem kameralarla prosesi izləyib və robotik qollar vasitəsilə seçdiyi nahiyəyə 250 nanolitr gen terapiyası yeridib. Hər mərhələ üçün baytar həkiminin təsdiqi tələb olunub. Təcrübədə bəzən süni intellekt modelləri əməliyyatı yerinə yetirməkdən imtina edib; tam əməliyyatı başdan sona tamamlayan model isə “Sonnet 5” olub. Şirkətin məlumatına görə, siçan əməliyyatdan sonra sağalıb; lakin müalicənin effektivliyi hələ dəqiq təsdiqlənməyib və təcrübə ilkin mərhələdə davam edir.