Qafqaz News Baku.ws-a istinadən xəbər verir ki, Bakıda yeraltı və yerüstü piyada keçidlərində quraşdırılmış liftlər və eskalatorlar yenilənəcək, həmçinin əlil arabaları üçün nəzərdə tutulan platformalar dəyişdiriləcək. Layihəni LiftTəmir İstehsalat Birliyi həyata keçirəcək. Məlumata əsasən, paytaxtın 14 fərqli ünvanında yerləşən piyada keçidlərində liftlərin yenilənməsi və əsaslı təmiri, eskalatorların, həmçinin əlil arabaları üçün platformaların yeni nüsxələrlə əvəz edilməsi nəzərdə tutulur. Ehtimal olunan layihə qiyməti 9 milyon 985 min manat kimi müəyyənləşdirilib. Qeyd olunur ki, piyada keçidlərində lift və eskalatorların saz vəziyyətdə olması xüsusilə yaşlı insanlar, uşaqlı valideynlər, hərəkət məhdudiyyətli şəxslər və əlil arabasından istifadə edən vətəndaşlar üçün rahatlığı artıracaq. Avadanlıqların yenilənməsi keçidlərdən istifadənin təhlükəsizliyini və əlçatanlığı yüksəldəcək, texniki nasazlıqların yaranmasının qarşısını almağa xidmət edəcək.