Milli Məclis noyabrın 3-ə planlaşdırılan iclasında İnzibati Xətalar Məcəlləsinə dair dəyişiklik layihəsini müzakirə edəcək. Qaydalara görə, zabit, gizir, miçman və müddətdən artıq həqiqi hərbi xidmət üzrə hərbi qulluqçuların məsuliyyəti gücləndiriləcək. Layihəyə əsasən, hərbi hissədən özbaşına çıxmaq, ya da müəsəs yerinə vaxtında gəlməmək halları 1 gündən artıq, lakin 10 gündən çox olmamaq şərti ilə 200 manatdan 300 manatadək cərimə ilə nəticələnəcək. Eyni zamanda, işin hallarına və həmin şəxsin şəxsiyyətinə görə 15 günədək müddətə inzibati həbs tətbiq oluna bilər. Əvvəlki qanunvericiliyə görə bu cəza 3 gündən çox, lakin 10 gündən çox olmamaqla tətbiq edilirdi. Həmçinin, tənbeh vermiş şəxs tərəfindən bir il ərzində təkrar törədilməsinə görə 300—500 manat arasında cərimə nəzərdə tutulur və bu halda 10 gündən 1 ayadək inzibati həbs tətbiq oluna bilər. Mövcud qanuna görə isə 15 gündən 1 aya qədər həbs cəzası tətbiq edilirdi. Layihədə vurğulanır ki, 1 gündən artıq hərbi hissədə və ya xidmət yerində olmamaq inzibati məsuliyyətə səbəb olacaq. Məsuliyyətin artırılması ilə yanaşı sanksiyanın yumşaldılması və alternativ cəza kimi cərimə növünün müəyyənləşdirilməsi mütərəqqi addım hesab olunur.