Qafqaz News Baku.ws-a istinadən xəbər verir ki, Paytaxtın Yasamal rayonu, 7-ci sallaqxana küçəsi 7A ünvanında fəaliyyət göstərən çörək emalı müəssisəsində nöqsanlar aşkarlanıb. Azərbaycan Qida Təhlükəsizliyi Agentliyi (AQTA) məsələ ilə bağlı açıqlama yayıb. Agentliyin əməkdaşları fiziki şəxs Cəfər Zabit oğlu Cavadlıya məxsus müəssisədə planlı olmayan yoxlama keçirib. Yoxlama zamanı qida təhlükəsizliyi sahəsində texniki normativ hüquqi aktların tələblərinin pozulması faktları müəyyən edilib. Məlumata görə, müəssisə antisanitar şəraitdə fəaliyyət göstərib, qeydiyyatdan keçmədən işlədiyi, texnoloji ardıcıllıq prinsiplərinə əməl edilmədiyi, istehlak üçün nəzərdə tutulan çörəklərin polimer qablaşdırmalarda antisanitar vəziyyətdə saxlanıldığı aşkarlanıb. Nöqsanlarla bağlı inzibati protokol tərtib edilib; nöqsanlar aradan qaldırılana qədər müəssisənin fəaliyyəti dayandırılıb.