QafqazNews Konkret.az-a istinadən xəbər verir ki, Prezident İlham Əliyev Pakistanın Baş naziri Şahbaz Şərifin Zəfər Günü münasibətilə göndərdiyi təbrikə cavab olaraq ona təşəkkür edib.
Əliyev bu barədə sosial şəbəkə hesabında paylaşım edib. O, Şərifə müraciətində həm özünü, həm də Azərbaycan xalqını səmimi şəkildə təbrik etdiyinə görə minnətdarlığını ifadə edib.
Prezident qeyd edib ki, 8 Noyabr Azərbaycan xalqı üçün torpaqların azad edilməsini və təxminən 30 il davam etmiş işğalın sona çatmasını simvolizə edən əlamətdar tarixdir.
Paylaşımda Pakistanın dəyişməz həmrəyliyinin yüksək qiymətləndirildiyi bildirilib. Əliyev, həmçinin Şahbaz Şərifin ötən il Bakıda təşkil olunan Zəfər Paradında iştirakını iki ölkə arasındakı dostluq və qardaşlığın növbəti ifadəsi kimi dəyərləndirib.
