QafqazNews Bakupost.az-a istinadən xəbər verir ki, noyabrın 5-də Bakı Avropa Liseyində Vətən müharibəsi şəhidi Namiq Quliyevin xatirəsinə “Zəfər əmanəti” adlı tədbir təşkil olunub.
3a2 sinif şagirdlərinin qatıldığı mərasim təlim-tərbiyə işləri üzrə direktor müavini Ülkər Mirzəyevanın təşkilatçılığı ilə keçirilib. İştirakçılar şəhidin həyat və döyüş yolunu, müharibədə göstərdiyi qəhrəmanlığı və Vətənə sədaqətini ehtiramla yad ediblər.
Tədbirdə bildirildiyinə görə, Namiq Quliyev 2020-ci il sentyabrın 27-də başlayan Vətən müharibəsi zamanı Cəbrayıl, Füzuli və Xocavənd istiqamətlərində döyüşüb. Ailənin yeganə övladı olan Quliyev könüllü şəkildə ön cəbhəyə yollanıb və noyabrın 5-də Xocavənd istiqamətində gedən döyüşlərdə həlak olub. O, II Fəxri xiyabanda dəfn edilib.
Prezident İlham Əliyevin sərəncamları ilə Namiq Quliyev ölümündən sonra “Vətən uğrunda” və “Xocavəndin azad olunmasına görə” medallarına layiq görülüb.
Mərasimdə şəhidin həyatından və döyüş yolundan bəhs edən “Günəş boyda dünya” filmindən parçalar göstərilib, şagirdlərin hazırladığı videoçarxlar təqdim olunub. Uşaqlar Vətən sevgisi, qəhrəmanlıq və Zəfər haqqında şeirlər səsləndirib, 44 günlük müharibənin tarixi, xalqın birliyi və Azərbaycan Ordusunun Qələbəsi barədə fikirlərini bölüşжээiblər.
Tədbirin yadda qalan hissələrindən biri balaca Namiqin səhnədə etdiyi müraciət olub. Çıxış şəhidlərin xatirəsinin gələcək nəsillərin yaddaşında qorunmasının və qəhrəmanlıq tarixinin gənclərə çatdırılmasının önəmini vurğulayıb.
Mərasimin sonunda liseyin həyətində Namiq Quliyevin xatirəsinə ağac əkilib və onun adına xatirə lövhəsi quraşdırılıb. Bu addım şəhidin adının yaşadılması və qəhrəmanlıq irsinin gələcək nəsillərə ötürülməsi məqsədi daşıyıb.
“Zəfər əmanəti” tədbiri şəhidlərin miras qoyduğu Qələbənin dəyərini, Vətənə sevginin müqəddəsliyini və tarixi yaddaşı qorumağın vacibliyini bir daha diqqətə çatdırıb.
