QafqazNews Oxu.az-a istinadən xəbər verir ki, Mərkəzi Bankın sədri Taleh Kazımov 2027-ci ilin dövlət büdcəsi layihəsinin parlamentdə müzakirəsi zamanı manatın məzənnəsinə dair fikirlərini açıqlayıb.
Onun sözlərinə görə, büdcə sənədində manatın sabit məzənnəsinin makroiqtisadi çərçivənin əsas elementlərindən biri kimi göstərilməsi bu istiqamətdə gözləntilərə müsbət təsir edə bilər. Kazımov mövcud meyillərin qorunacağı təqdirdə fiskal sektorun valyuta təklifinin bazardakı tələbi ödəmək üçün yetərli olmalı olduğunu bildirib.
Mərkəzi Bank sədrinin qeyd etdiyinə görə, dövlət xərclərinin ehtiyatlı artırılması inflyasiyaya nəzarət baxımından da vacibdir. Qurumun hesablamaları 2027-ci il üçün nəzərdə tutulan büdcə xərclərinin cari xərclər vasitəsilə inflyasiyaya təsirinin cəmi 0,34 faiz bəndi olacağını göstərir. Əsaslı xərclərin təsiri isə neytral qiymətləndirilir.
Kazımov makroiqtisadi hədəflərin təmin olunmasında fiskal və pul siyasətlərinin səmərəli əlaqələndirilməsinin əhəmiyyətini vurğulayıb. O bildirib ki, Mərkəzi Bank gələn il də əvvəlki illərdə olduğu kimi Maliyyə Nazirliyi ilə valyuta bazarındakı vəziyyətin tənzimlənməsi və likvidliyin idarə edilməsi üzrə sıx əməkdaşlıq edəcək.