QafqazNews Konkret.az-a istinadən xəbər verir ki, təhsil eksperti Ramin Nurəliyev universitet və kolleclərdə vahid geyim formasının tətbiqini məqsədəuyğun hesab etmir. Azərbaycanda məktəblər üçün vahid geyim qaydasının mövcudluğu ali və orta ixtisas təhsili müəssisələrində də bu məsələnin müzakirəsini gündəmə gətirib.
Nurəliyevin sözlərinə görə, beynəlxalq təcrübədə mülki universitet və kolleclərdə eyni geyim qaydasına geniş şəkildə rast gəlinmir. Belə tələblər, əsasən, xüsusi təyinatlı təhsil müəssisələrinə aiddir. Azərbaycanda Polis Akademiyasında, Dövlət Təhlükəsizliyi Xidmətinin Akademiyasında və Sərhəd Qoşunlarının təhsil müəssisələrində forma geyinilməsi həmin qurumların təhsil istiqamətinin özəlliyi ilə bağlıdır.
Ekspertin fikrincə, mülki ali məktəblərdə vahid forma əvəzinə tələbələrin geyim seçiminə müəyyən hədlər daxilində qaydalar tətbiq oluna bilər. O, təhsil mühitinə uyğun gəlməyən, çox açıq və qısa geyimlər, eləcə də bəzi geyim elementləri üçün tələblərin müəyyənləşdirilməsini mümkün sayır.
Nurəliyev qeyd edib ki, bəzi ölkələrdə təhlükəsizlik və şəxsiyyətin tanınması məqsədilə üzü tam örtən geyimlərə məhdudiyyət qoyulur. Bu yanaşma niqabdan istifadə qaydalarında da əks olunur. Bundan başqa, ayrı-ayrı təhsil müəssisələri tələbələrin görünüşü və geyimi ilə bağlı daxili standartlar müəyyən edir.
Ekspert universitet və kolleclərin tələbələrə sərbəst geyim seçimi verən mühit olaraq qalmalı olduğunu vurğulayıb. Bununla yanaşı, bu sərbəstliyin etik normalar və ümumi davranış qaydaları çərçivəsində tənzimlənə biləcəyini bildirib. Onun qənaətinə görə, ali və orta ixtisas təhsili müəssisələrində məktəblərdəki kimi vahid geyim formasının tətbiqi real görünmür.
