QafqazNews Konkret.az-a istinadən xəbər verir ki, Almaniyada atom elektrik stansiyalarının bağlanmasına baxmayaraq, onilliklər boyu yaranan radioaktiv tullantıların taleyi həllini gözləyir. Tullantıların başqa ölkəyə göndərilməməsi və Almaniya ərazisində xüsusi şəraitdə basdırılması nəzərdə tutulur.

Daimi basdırılma sahəsinin tapılması ilə təxminən on ildir Radioaktiv Tullantıların Yekun Basdırılması üzrə Federal Cəmiyyət (BGE) məşğul olur. Araşdırmalar ölkə ərazisinin cəmi 5 faizinin belə bir obyekt üçün mümkün uyğunluq daşıdığını göstərib.

Daimi saxlanc yerinin 2050-ci ilə qədər müəyyən olunacağı gözlənilir. Bəzi siyasətçilər isə axtarış və qərarvermə prosesinin daha tez yekunlaşmasını istəyir.

Nüvə tullantılarının yekun basdırılması Almaniyanın təkbaşına üzləşdiyi məsələ deyil. Atom elektrik stansiyaları hazırda işləyən və ya keçmişdə fəaliyyət göstərmiş 31 ölkədə bu problem hələ tam həllini tapmayıb.

Finlandiya bu sahədə ilk nümunəni yaradıb. Ölkənin qərbindəki adada, iki atom elektrik stansiyasından birinin yaxınlığında, yerin təxminən 400 metr altında “Onkalo” adlı xüsusi yeraltı anbar tikilib. Layihənin tamamlanması təxminən 40 il çəkib.

Radioaktiv tullantıların daimi saxlanması üçün infrastruktur qurmaq çox böyük xərc tələb edir. Almaniya hazırda uyğun sahə axtarışına və tullantıların müvəqqəti məntəqələrdə qorunmasına ildə təxminən 1,4 milyard avro xərcləyir.

Ekspertlər daimi yeraltı anbarın tikintisinin ümumi dəyərinin təxminən 14 milyard avroya çata biləcəyini hesablayırlar. Bu anbarda təxminən 28 min kubmetr radioaktiv tullantının uzunmüddətli təhlükəsizlik təminatları ilə yerin dərinliyində saxlanması planlaşdırılır.

Almaniya üçün əsas məsələ tullantıların basdırılacağı yeri seçməklə bitmir: onların gələcək nəsillər üçün minilliklər ərzində təhlükəsiz qalmasının necə təmin ediləcəyi də açıq sualdır.